嚟到愛媛縣大洲市嘅餐廳，遊客可以品嚐到由淡水魚或栗子等特產製作而成嘅料理、又或自古傳承至今嘅鄉土料理等各式美食。以下就為要大家介紹大洲市4大必食名物美食推介！
1. 大洲可樂餅
為咗令大眾能夠更方便就食到大洲鄉土料理「大洲煮里芋」，呢款「大洲可樂餅」創新料理因此就應運而生。大洲可樂餅係一款將芋頭配搭蔬菜及雞肉熬煮而成、並裹上麵包粉炸成嘅料理，芋頭軟燸嘅口感與酥酥脆脆嘅外皮非常匹配。雖然大洲可樂餅內餡嘅大洲煮里芋口味會因應店鋪而有所不同，但大多數都會都帶有甜味。
想要品嚐大洲可樂餅的話，您可以前往「食事處 西川 (お食事処 にし川)」、「牛腸鍋居酒屋 熱炎 (もつ鍋居酒屋 熱炎)」等。上述餐廳定價都非常實惠，約150日圓到400日圓之間就可以食到！（截至2019年8月資訊）
2. 石川鮭魚味噌
「石川鮭魚味噌」使用由河邊地區清流孕育出嘅石川鮭魚製作而成。經典食法係將香煎後嘅石川鮭魚放入大洲特產嘅麥味噌汁當中，然後再放於白飯上。石川鮭魚味道新鮮、無魚腥味，與味噌非常匹配。加入青瓜或芝麻的話，就可以帶出更豐富風味！
大洲市內有多間提供「石川鮭魚味噌」嘅食店，其中推薦位於河邊地區嘅「河邊故鄉之宿 (河辺ふるさとの宿)」、「石川鮭魚之里 (あまごの里)」等餐廳。散叫約為400日圓、套餐約為2,000日圓。（截至2019年8月資訊）
3. 大洲煮里芋
「大洲煮里芋」係一道歷史超過350年、極具代表性嘅鄉土料理。主要食材為里芋，並加入油炸豆皮、蒟蒻、蔬菜及雞肉等食材熬煮而成。
相傳呢道料理起源於當地傳統儀式中，農民將當地特產里芋放入鍋中熬煮而得來。現時每年8月下旬到10月下旬，當地人都會嚟到肱川河邊、圍著煮里芋嘅大鍋舉辦宴會，特色風景已成為大洲秋季例行風光之一。
想要品嚐大洲煮里芋嘅遊客，可以到「Tono Machi Tarui (との町たる井)」、「Muraya (むらや)」等餐廳。基本上傳統料理只限於8月下旬到10月下旬之間提供。另外請注意，除咗「Tono Machi Tarui (との町たる井)」，其他餐廳幾乎都需要事先預約。預算大約為1,000日圓〜2,000日圓左右。（2019年8月資訊）
4. 豬肉栗子蓋飯
「豬肉栗子蓋飯」使用當地特產栗子及豬肉製成。料理由「大洲市交流促進中心 鹿野川莊」大廚研發、並使用栗燒酒製作。加入咗栗燒酒煮成嘅豬五花肉同栗子嘅風味及口感可謂配合得天衣無縫！
第一次品嚐嘅遊客建議先嘗試原味，食到中途再放入加咗黑胡椒嘅日式高湯，如此一來就可以感受味道變化，增添味覺樂趣啦！
「大洲市交流促進中心 鹿野川莊」、「大洲爐端 油屋」都有提供「豬肉栗子蓋飯」。價位約為700日圓〜1,100日圓之間。（2019年8月資訊）
Comments