渡嘉敷島位於沖繩那霸以西約32公里處，島嶼四周被高透明度嘅蔚藍大海包圍。除咗各式水上活動，遊客喺冬天嚟到嘅時候仲可以觀賞鯨魚，係一個非常熱門嘅旅遊區。島上處處都係茂密山林，內裡仲有多個可以觀賞渡嘉敷島自然同絕景嘅地點𠻹！
關於渡嘉敷島
渡嘉敷島屬於沖繩縣離島慶良間群島嘅一部分，係慶良間群島面積最大嘅島嶼。渡嘉敷島從北到南呈現狹長形，觀光區可分為南部阿波連、中部渡嘉志以及北部渡嘉敷共三個部分。
渡嘉敷島必睇必玩景點
渡嘉敷島每個區域都各有特色，以下就要為大家介紹各區域嘅推薦景點以及戶外活動。
南部阿波連區：渡嘉敷島主要海灘「阿波連海灘」
嚟到南部嘅阿波連，您會見到遊客如鯽嘅熱鬧「阿波連海灘」，亦可以搵到人跡罕至嘅隱世海灘。其中，「阿波連海灘」就係一個非常推薦嘅海灘。純白沙灘綿延約800米長，仲有蔚藍大海做背景，可謂享受海水浴嘅最佳景點！您可以喺到體驗到珊瑚礁浮潛、香蕉船以及海上皮划艇等各種活動。
另一方面，島嶼南端嘅「阿波連園地」亦係一大推薦。除咗觀賞亞熱帶植物、五顏六色四季花卉外，您仲以喺到見到渡嘉敷島特有、由凝灰岩形成嘅白色地層自然景觀𠻹！
中部渡嘉志久區：有機會與海龜相遇！「渡嘉志久海灘」
中部嘅渡嘉志久地區以「渡嘉志久海灘」為中心。「渡嘉志久海灘」係一個淺海灣，以上岸食淺灘海藻嘅海龜們而聞名。如果揀啱時機的話，您甚至有機會同海龜一齊游水呢！
旁邊嘅「渡嘉志久海岸公園」內則設有觀景台，遊客可以喺到眺望淺翡翠綠大海以及美麗白沙灘。
北部渡嘉敷區：以渡嘉敷港為中心、自然非常豐富！
北部嘅渡嘉敷以渡嘉敷港村落為中心，四周為海拔200米高嘅連綿起伏山脈。區內設有多個觀景台，方便遊客於大自然中散步、遊覽絕景景點。
例如可以眺望港口嘅山丘展望台「港口展望台」，就係島內唯一能夠一覽島上村落風景嘅地方，您仲可以喺到欣賞進出港口嘅船隻𠻹。
最高峰赤間山嘅「國立沖繩青少年交流之家」佔地內則設有「西展望台」及「東展望台」，無論到邊個天文台都可以欣賞到由蔚藍大海及周遭島嶼所編織成嘅靚景！
渡嘉敷島美食及餐廳
遊客喺渡嘉敷島內可以品嚐到使用沖繩高級魚「烏尾冬」或吞拿魚等當地捕獲海鮮製作而成嘅料理，當中又以吞拿魚加上特製醬汁醃製烘乾而成嘅「吞拿魚乾」為一大熱門推薦手信。
阿波連地區及渡嘉敷地區內亦有多間提供當地特色料理嘅餐廳。
渡嘉敷島酒店及旅館
渡嘉敷島嘅住宿設施數量因各區而異。
阿波連地區以阿波連港周邊嘅住宿設施最為充足，當中大部分為民宿，亦有部分為度假酒店或公寓式酒店。
渡嘉志久地區嘅住宿設施數量比較少，但依然有海灘而建嘅酒店。
渡嘉敷地區內嘅渡嘉敷港周邊有多間民宿及公寓式酒店。區內有唔少住宿每晚只需3,000~5,000日圓，如果想要搵抵住嘅選擇，咁呢區就係您嘅首選喇！ 資訊(截至2019年8月)
從那霸前往渡嘉敷島嘅交通方式
要前往達渡嘉敷島，您可以從沖繩那霸市「泊港渡輪碼頭」乘搭高速船或渡輪到渡嘉敷島玄關口「渡嘉敷港」。乘搭高速船約需35分鐘、乘搭渡輪則約需1小時10分鐘。
每個地區距離渡嘉敷港都有一段距離，因此建議乘搭當地巴士前往各處，但當地巴士僅會停靠於渡嘉敷港、渡嘉敷港附近嘅村公所前以及南部阿波連海灘，如果要前往其他觀光景點的話，建議選搭的士、租車或徒步。
相關資訊
- 名稱：渡嘉敷島（渡嘉敷港）
- 地址：〒901-3501 沖繩縣島尻郡渡嘉敷村字渡嘉敷346
- 交通方式：泊港→[高速船]約35分鐘→渡嘉敷港
- Wi-Fi：有（渡嘉敷港旅客候船處・青少年旅行村管理棟有Wi-Fi熱點）
- 語言：英文
- 信用卡：可使用VISA, MasterCard, JCB, AMERICAN EXPRESS, Diners Club International（依設施而異）
Comments