遊日本静岡縣嘅伊豆時，除咗欣賞靚靚海景，仲有唔可以錯過嘅當地美食！伊豆嘅餐廳分布於市區各地，多數提供使用當地產食材製作嘅料理，從日本料理到甜品，種類眾多。今次就喺眾多料理當中，為大家精選5大特別推薦嘅美食啦。
野豬鍋
野豬鍋（いのしし鍋）係伊豆市天城地域嘅鄉土料理。煮得柔軟、入口即溶嘅「野豬肉」同香菇、白菜、蔥、豆腐等食材一齊落鍋煮。濃郁且偏甜嘅味噌風味鍋品，可以講係匯聚各種食材精華嘅一道絕品好餸。另外，野豬肉片嘅擺盤都精美到好似一碟「牡丹花」咁，所以都被稱為「牡丹鍋」。唔講你可能唔知，其實天城係日本「野豬三大狩獵產地」之一嚟㗎。
提供野豬鍋嘅餐廳多數集中喺天城地域。其中特別推薦「伊豆的佐太郎」和「月之瀨 SASANO（月ヶ瀬 ささの）」呢兩間餐廳。平均價格約2,000～4,000円左右。（截至2019年8月資訊）
生山葵
伊豆市係静岡縣數一數二嘅山葵（即芥末）產地，生芥末嘅市場出產量更係日本全國第一。恰到好處嘅辛辣度同爽口等餘味為其特徵。使用生芥末做成嘅當地名產料理款式眾多，例如有蓋飯、醃漬食品、味噌等，連雪糕都有！蓋飯同醃漬食品可以喺伊豆市內各地餐廳品嚐得到，但係生芥末軟雪糕就只有喺修善寺溫泉區同道之驛「越過天城（天城越え）」先買得到，推薦去「Caf’e 弘乃」。如果想試吓生芥末嘅蓋飯等日式料理，推薦去「山葵園 KADOYA（わさび園 かどや）」。每間店嘅價錢都唔同，但一般而言蓋飯等料理大約700円左右，雪糕約350円。（2019年8月當前資訊）
鯰魚（鮎魚）料理
流經伊豆市嘅狩野川，係撈捕鯰魚（俗稱鮎魚）嘅知名產地。使用喺呢度捕獲鮎魚所製嘅料理，亦成為伊豆當地特產之一。生活喺狩野川一帶嘅鮎魚以香味濃郁為特徵，料理方式有鹽烤、壽司、「甘露煮」（使用砂糖、醬油、味醂等調味料烹煮，鹹鹹甜甜嘅日式家常料理）等等，料理方式相當多樣。另外，食鮎魚嘅最佳時期為5月下旬至10月下旬左右，喺初夏至秋季去遊伊豆時就要試吓啦！
提供鮎魚料理嘅餐廳，多坐落喺伊豆市內、狩野川周邊地區。其中更以「柳光亭」、「狩之川屋」、「鮎魚茶屋（鮎茶屋）」等較為知名。鹽烤、「甘露煮」等單點料理大約1,000円以內，定食套餐嘅話大約1,600～2,000円左右。（截至2019年8月資訊）
黑米
黑米係伊豆市修善寺地區嘅特產。特徴為略帶甘甜、芳醇嘅香氣、同埋彈牙口感。另外，同一般白米相比，含有更多嘅維生素B1、B2、鐵質同蛋白質，係相當受歡迎嘅健康食品。黑米做成嘅料理從黑米蕎麥麵、黑米炒飯，至甜品糕點如雪芳蛋糕、黑米軟雪糕等冰淇淋等都有，種類豐富眾多。
想試呢啲黑米料理嘅話，咁就要安排去一去修善寺地區喇！特別推薦「修善寺蕎麥麵店 四季紙（修善寺そば処 四季紙）」、「食堂YUKAWA（食堂ゆかわ）」同「honohono cafe」等店。平均預算方面，麵飯類約1,000円左右、甜品糕點約500円內。（截至2019年8月資訊）
日式大菜「心太」（ところてん，Tokoroten）
「心太」（ところてん，音讀Tokoroten，類似大菜糕嘅大菜）係西伊豆地方嘅特產。使用名為「天草」嘅海藻為材料，水煮過後，將煮好嘅大菜液冷卻凝固後而製成「心太」。西伊豆嘅「心太」因製作時多使用天城山麓或富士山嘅湧泉水，所以彈牙口感同有咬口為特徵而出名。
伊豆嘅「心太」以外賣帶返屋企食為多，可以喺店內食到嘅餐廳較少。如果想堂食嘅話，推薦去「甘味伊豆河童 三島廣小路店」、「堂之島食堂」、「地魚 櫻花（地魚 さくら）」等店。
每間店嘅價格都唔同，一般大約500～600円左右。醒你一個貼士，喺「堂之島食堂」嗌其他嘢食，仲可以免費任食附贈嘅「心太」添！（截至2019年8月資訊）
Comments