奈良嘅藥師寺位於奈良市西部地區、平城京以西嘅西之京。東西雙塔係藥師寺嘅代表性標誌，係日本最早以雙塔基嘅配置建造嘅寺廟。另外，據說喺奈良時代佛像雕刻最高傑作嘅「藥師三尊像」都係必睇嘅，銅造佛像經過數百年嘅氧化，表面已經黑得發亮，變到好似乾漆製造嘅佛像咁。
經過多年歷練嘅藥師寺
7世紀後半，天武天皇為咗祈求皇后病情能夠痊癒而發願興建佛寺，最初係位於飛鳥（以現在嘅奈良縣高市郡明日香村為中心嘅地區），八世紀初隨著遷都平城京搬遷至西之京現址。 之後，藥師寺遭受各種天災人禍，除咗東塔以外幾乎全毀。從昭和到平成年間，藥師寺經歷多年整修，已恢復創建當時嘅樣貌。因為經過修建，寺院境內嘅建築色彩多數睇起嚟都好鮮豔。
另外，藥師寺嘅「抄經」都非常出名。而修復嘅資金幾乎都係來自抄經累積得嚟嘅香油錢嚟㗎。
藥師寺嘅必睇重點
藥師寺嘅必睇重點，首先係安置本尊「藥師三尊像」嘅金堂。藥師三尊像中央主尊為藥師如來坐像，右邊係手持日輪嘅日光菩薩立像，左邊係手持月輪嘅月光菩薩立像。呢啲佛像原本表面係鍍金嘅，但由於多年來與空氣接觸及經歷天災等，變成現時漆黑佛像嘅面貌。藥師三尊像飽滿圓潤嘅造型、袈裟衣紋等刻畫手法，展現咗中國初唐文化嘅風格，係日本公認最高傑作之一嘅古佛像。日光菩薩及月光菩薩扭腰矗立嘅身姿曲線優美，值得好好欣賞。
第二個必睇嘅係保留創建當時樣貌嘅「東塔」。從外觀睇起嚟好似個六層塔，但其實有三層係較細嘅裝飾層，實際上係三重塔。每一層都裝有「裳階」（即小屋簷），唔只用嚟當做裝飾，亦可以分散強風吹嚟嘅力道。東塔嘅塔身，有大屋簷同小屋簷重重疊疊又工整又帶點躍動感，被研究東洋美術史嘅美國學者Ernest Fenollosa譽為「定格的樂章」。藥師三尊像同東塔都被列為日本國寶。
其他值得欣賞嘅建築仲有於昭和56年（1981年）重建，色彩鮮豔嘅「西塔」、僧侶用餐嘅食堂、祭祀中國著名玄奘高僧嘅「玄奘三藏院」建築等，同埋好多其他佛堂、塔等。
去藥師寺嘅交通方法
從近鐵京都站搭乘近鐵經過大和西大寺，約35分鐘到西之京站落車。從朝早10點到下午4點，從近鐵京都站出發嘅特急、急行列車都會停西之京站。從近鐵西之京站北口嘅「與樂門」行1分鐘就到藥師寺。初次到訪嘅話，建議從寺院正面嘅南門開始參訪。從西之京站去南門，沿著鐵道線路嘅西側往南走，見到河川轉左，繼續行。行入藥師寺嘅大門後，可以見到中門、金堂、大講堂一字排開，金堂前方可以睇到東西雙塔。
景點資訊
- 名稱：藥師寺
- 地址：奈良縣奈良市西之京町457
- 交通方式：於西之京站落車
- 語言：提供英文嘅導覽手冊
- 入場費：1100円（一般參拜：白鳳伽藍、玄奘三藏院伽藍）、1600円（共通參拜券：一般參拜券+西塔、食堂）
- 開放時間: 08:30～17:00（參拜受理時間至16:30截止）
- 休息日：全年無休
Comments