長崎嘅崇福寺係中國式寺院，寺內有2件日本國寶、5件國家指定重要文化財產，仲有好多縣指定有形文化財產、市指定有形文化財產等等，堪稱係一個文化財產嘅寶庫！
崇福寺簡介
崇福寺興建於寛永6年（1629年），係由居住喺長崎嘅中國福建省人要求，邀請中國嘅高僧超然嚟興建，係日本最古老嘅中國式寺院。因信徒多為中國福建省福州出身，所以又名福州寺。崇福寺內有好多珍貴嘅建築文物，例如被列為國寶嘅朱紅色「第一峰門」、本堂「大雄寶殿」；主要供奉觀音菩薩嘅「護法堂」；懸掛梵鐘嘅「鐘鼓樓」等。
作為一座中國式寺院，從崇福寺嘅建築中，可以睇到好多中國風嘅元素：供奉航海嘅守護神、中國道教中女性神明「媽祖堂」、門上有象徵福氣嘅「蝙蝠」圖樣等。嚟到崇福寺，可以喺寺內散散步、搵吓呢啲得意有趣、富中國宗教色彩嘅元素呀！
崇福寺嘅特色
嚟到崇福寺必睇嘅重點，就係被列入日本國寶嘅第一峰門同大雄寶殿。第一峰門係於元祿9年（1696年）用從中國寧波船運到日本嘅材料重建，受到中國明、清朝建築風格影響，喺歷史文化上具有重大價值。另外，大雄寶殿嘅建築材料亦係從中國運嚟嘅，一開始係單層屋頂，後來融合咗日本風格，改成雙層屋頂。喺崇福寺，可以睇到融合中國風同日本風嘅寺廟建築。
去崇福寺嘅交通方法
從「長崎站前」電車站乘搭開往崇福寺方向嘅路面電車，車程約12分鐘，於崇福寺站落車步行3分鐘。
景點資訊
- 名稱：崇福寺
- 地址：〒850-0831 長崎縣長崎市鍛冶屋町7-5
- 交通方式：從崇福寺站落車步行3分鐘
- 入場費：300円
- 開放時間：08:30～17:00
- 固定休息日：沒有
Comments