石川縣小松市嘅那谷寺內有好多值得一睇嘅景點，例如，供奉於洞窟內嘅千手觀音、猶如山水畫般嘅「奇岩遊仙境」、被列為日本國家重要文化財嘅「本堂」等。2015年，那谷寺更榮獲法國米芝蓮綠色指南1星評級。今次就同大家介紹那谷寺嘅歷史同必睇特色。
關於那谷寺
那谷寺嘅創建，據說源自養老元年（717年），高僧泰澄大師將夢中所見嘅千手觀音雕刻出來，並安奉喺寺內嘅岩窟中。中世紀時，淨土真宗本願寺派嘅信徒發起名叫「一向一揆」嘅抵抗強權運動。喺呢場民亂中，有好多寺廟建築被摧毀，之後由加賀藩第三代藩主，前田利常重建。那谷寺嘅本堂（本殿、唐門、拜殿）、書院、三重塔、護摩堂、鐘樓等七棟建築物均被列為日本國家重要文化財產；而「奇岩遊仙境」同庫裏庭園更被列為日本國家名勝。
那谷寺嘅特色
第一個必睇嘅就係「奇岩遊仙境」，呢度有一系列奇岩異石，係寺院內令人出乎意料之外嘅景觀。據說呢個係遠古時期，海底火山爆發嘅遺址，歷經長年歲月形成。寺院內深處有一座朱紅色鳥居，有祭祀稻荷大神嘅稻荷神社（現由於安全考量，被列為保護區禁止進內）。
木造嘅本殿亦係必訪景點。被稱為「大悲閣」嘅參拜殿嘅四面圍欄上，有加賀藩知名大工—山上善右衛門氏所雕刻嘅鏤空雕飾。裡面供奉著本尊「十一面千手觀音菩薩」。
另外，仲可以進入巨大嘅岩石洞穴內體驗「岩屋胎內巡拜」。洞窟象徵母親肚內，據聞穿過岩石洞窟可以淨化身心，洗淨罪過，表示重生。
那谷寺嘅四季美景
那谷寺嘅一年四季都有唔同嘅花卉植物景觀可以欣賞。春天有櫻花、水仙；初夏有繡球花；秋天有紅葉美景。而那古寺嘅紅葉係石川縣數一數二嘅賞楓知名景點，奇岩遊仙境嘅白色岩壁同紅葉相互輝映，構成一幅美麗嘅畫面。另外，寺廟境內展望台上方嘅「鎮守堂」視野極佳，可以眺望那谷寺紅葉景觀。最佳賞紅葉時期為11月。
去那谷寺嘅交通方式
從JR北陸本線粟津站出發
乘搭「往粟津A路線那谷寺方向」嘅小松巴士約15分鐘，於「那谷寺」落車。乘搭的士約10分鐘抵達。
從JR北陸本線小松站出發
乘搭「往粟津A路線那谷寺方向」嘅小松巴士約40分鐘，於「那谷寺」落車。乘搭的士約30分鐘抵達。
景點資訊
- 景點名稱 : 那谷寺
- 地址 : 石川縣小松市那谷町ユ122
- 交通方式 : 離最近嘅那谷寺巴士站落車
- 是否提供Wi-Fi : 僅限山門附近可免費使用Wi-Fi
- 對應語言 : 官網設有中文繁體字、英語、法語、泰語
- 票價 : 600円（書院、庭園+200円）
- 開放時間 :
- 夏季（3月1日～11月30日）：08:30～16:45
- 冬季（12/1～2/2）：08:45～16:30
- 固定休息日：沒有
Comments