金澤鈴木大拙館為紀念佛教哲學家而設充滿禪意嘅紀念館

位於石川縣金澤市嘅鈴木大拙館，係為咗紀念一位畢生致力向西方推廣「禪」思想嘅佛教哲學者—鈴木大拙而設立嘅設施。除咗展示同鈴木大拙相關嘅內容，充滿禪意嘅建築空間都係一大特色。

關於鈴木大拙館（D.T. Suzuki Museum）

鈴木大拙館坐落於鈴木大拙嘅出生地—金澤，於2011年開館。鈴木大拙在生時出咗好多有關「禪學」嘅英文書籍，並積極奔走於歐美國家，透過講學嚟推廣禪文化，積極將東方精神文化傳播至西方。

本館透過相、著作、書籍等展示品，讓人了解更多呢位大師嘅哲學思想，仲提供一個充滿禪意嘅空間讓人漫步沉思。

鈴木大拙館係由金澤出身嘅國際知名建築師，谷口吉生所設計。整體由「玄關棟」、「展示棟」、「思索空間棟」三棟建築，以及「玄關之庭」、「露地之庭」、「水鏡之庭」三個庭園所組成。

以下為你介紹鈴木大拙館嘅必睇之處！

有別於一般嘅展示空間，鈴木大拙館內嘅展品幾乎都無太多嘅標示或文字解說。呢種設計其實都係遵循鈴木大師嘅思想，強調真正「禪」係需要親身體悟，要理解就要自己去體會，唔能夠依賴文字性嘅引導，咁就可以減少太多先入為主嘅想法。

三個庭園中，最引人矚目嘅就係「水鏡之庭」。周圍嘅四季景緻同建築物倒映喺池面嘅畫面都非常靚。水池中有裝置，每隔一段時間，水面就會產生一圈圈嘅漣漪，帶來動與靜嘅結合。站喺「水鏡之庭」前，凝視池面時，靜心感受身心達「無」（平靜）嘅狀態。

三棟建築物中，彷彿漂浮喺「水鏡之庭」上嘅｢思索空間棟｣特別吸引人目光。呢個係一個俾訪客可以靜心沉思嘅地方。方形嘅｢思索空間｣裡，四面牆壁被塗成黑色，中央放置榻榻米座椅，天花板有一個圓形天井，將光線引入室內；建築物四邊各有一個出入口，可以欣賞室外嘅景觀。

鈴木大拙館嘅開館時間為09:30〜17:00（最後入館時間為16:30）。休館日係逢星期一及日本新年假期。另外，入場費為大人300円。（2019年6月資料）

從JR金澤站乘搭「北鐵巴士」或「城下町—金澤周遊巴士」，車程約15分鐘，於本多町站落車步行約4分鐘可抵達鈴木大拙館。