「若草山燒山祭」係奈良縣若草山每年冬天舉行嘅傳統祭典，可謂古都奈良宣告早春來臨嘅傳統活動。若草山上點火後，慢慢整座山峰就會燃起熊熊烈火，冬天澄澈嘅夜空頓時變成一片紅，如夢似幻嘅景象令人嘆為觀止！
若草山燒山祭歷史
「若草山燒山祭」指嘅係喺若草山上放火燒除雜草嘅一項傳統祭典。燒山祭起源眾說紛紜，有一說法係如果每年一月前，唔燒若草山去鎮壓山上古墳嘅孤魂野鬼的話，就會有唔吉利嘅事發生。好多日本人都因為迷信，所以經過呢座山都會隨手點火燒山，但此舉卻會燒到鄰近神社或寺廟，造成危險與土地界線紛爭。為平息紛爭，江戶時代末期時，東大寺、興福寺春日大社就聯手舉辦儀式，每年放火燒若草山，鎮壓山頂古墳內嘅先人亡靈，亦成為「若草山燒山祭」由來。
若草山燒山祭特色
若草山燒山祭會首先喺春日大社點燃聖火，由「聖火行列（聖火遊行隊伍）」將其運送至若草山。天黑之後會施放歷時15分鐘嘅煙花，再放火燒33公頃嘅若草山草地同周邊3,800平方米嘅草地。從若草山山腳下、奈良公園嘅浮雲花園望返上去就可以近距離感受雄雄烈火燒起上嚟嘅壓迫感，另一方面，喺平城宮跡望過去都有好好嘅視野，可以眺望燒得一片赤紅嘅若草山山峰，係一個熱門嘅攝影地點。
若草山燒山祭燒山時間
若草山燒山祭於每年1月第4個星期六舉行。祭典當日下午4點45分時會先喺春日大社點燃聖火，之後由僧人組成隊伍將聖火運送至若草山山麓。其後6點15分開始會施放長達15分鐘嘅煙花，緊接著6點30分就會進行燒山儀式。如果天氣唔好嘅話，燒山祭會延後。落細雨則照常舉行。順帶一提，若草山燒山祭當日係可以免費登山嘅。
奈良若草山交通方式
從京都出發，乘搭近鐵到近鐵奈良站落車，再轉奈良交通巴士（市內循環、外循環線）去到「東大寺大佛殿・春日大社前」站落車行15分鐘就到。或者近鐵奈良站直接行約30分鐘就到，將京都同奈良編喺同一日行程會好好多呀！
景點資訊
- 名稱：若草山燒山祭
- 地址：奈良県奈良市雑司町
- 交通：近鐵奈良站→[奈良交通巴士]→東大寺大佛殿・春日大社前站…步行約15分鐘
- Wi-Fi支援：有
- 對應語言：僅限日文
- 費用：免費
Comments