神奈川縣立「恩賜箱根公園」係作為日本皇室貴族避暑山莊及迎賓館而建造嘅離宮遺址嘅公園。於寬敞嘅庭園內，可以喺散步嘅同時欣賞四季變化嘅美景。從公園可以眺望蘆之湖及富士山等等箱根之美，係非常推薦嘅觀光景點。
去恩賜箱根公園欣賞絕景
恩賜箱根公園位於蘆之湖一個突出嘅半島「塔島」。明治時代以嚟作為日本皇室貴族用嚟避暑同招待海外賓客而建造嘅離宮。於1884年開始建造離宮，於1886年7月完工。當時嘅箱根離宮，以兩層樓高嘅西洋館同日本館為中心，隔離仲建造咗官邸同兵營。其後，大地震等災害相繼將建築物摧毀。受到戰爭嘅影響，重建計劃亦被迫停止。於戰爭過後嘅1946年，喺原本嘅離宮遺址上修建「恩賜箱根公園」，並對公眾開放。被大自然環抱下嘅恩賜箱根公園可以欣賞富士山、蘆之湖等美景，係非常受大家歡迎嘅箱根觀光景點。
恩賜箱根公園嘅參觀資訊
恩賜箱根公園可以免費入園。開放時間為上午9點至下午4點半。休息日為每年12月29日至下一年嘅1月3日。
恩賜箱根公園嘅特色
恩賜箱根公園嘅最大特色係可以從公園眺望周圍美麗如畫嘅景色。設備完好嘅庭園內，可以一覽蘆之湖及富士山嘅絕景。公園嘅中央區重現明治時期嘅西洋建築「湖畔展望館」。館内亦展出箱根離宮嘅資料等等。從湖畔展望館嘅露台仲可以同時欣賞到蘆之湖及富士山。仲可以喺館内Café喺咁靚嘅景色下嘆個下午茶添。園內嘅日本庭園景觀隨四季有變化，例如春天有櫻花同杜鵑花，秋天有紅葉，一年四季都適合去㗎。
去恩賜箱根公園嘅交通方式
從東京前往恩賜箱根公園嘅交通方式，先從「品川站」乘搭新幹線或JR電車，於「小田原站」落車，然後搭箱根登山鐵道，於「箱根湯本站」落車。最後從箱根湯本站乘搭「往箱根関所跡方向」嘅巴士，約40分鐘抵達「恩賜公園前」落車即到
景點資訊
- 景點名稱：神奈川縣立 恩賜箱根公園
- 地址：足柄下郡箱根町元箱根171
- 交通方式：於箱根湯本站乘搭「往箱根関所跡方向」嘅巴士，約40分鐘抵達「恩賜公園前」落車即到
- 是否提供Wi-Fi :沒有
- 對應語言：僅限日文
- 入場費：免費
- 可否使用信用卡：不支援
Comments