去到京都，梗係要食抹茶啦。但係又無特登去到宇治嘅時間，喺呢個時候，就去京都站購買啦！京都站周圍都非常方便，可以購買到各式各樣嘅抹茶名產。喺京都站一次過入手想要嘅商品，短縮購買時間，預留更多時間全力感受京都嘅美麗！今次，我哋就要為大家介紹一吓喺京都站附近販賣抹茶手信嘅店鋪！
人氣爆棚嘅名店
中村藤吉～生朱古力
人氣爆棚嘅名店，去到宇治，就一定唔可以錯過。店鋪所提供嘅餐單非常多元化，唔係凈係販售甜品，就連抹茶蕎麥麵都有提供！
呢個「生ちゃこれーと」生朱古力帶有抹茶同焙茶嘅味道，令人回味無窮。
濃厚嘅抹茶味唔會過分甜，一唔注意就一個接一個食落肚完全停唔到手！配合日本茶一齊品嘗就最佳啦。
店鋪情報
- 名稱: 中村藤吉 京都站店
- 地址: 京都府京都市下京區烏丸通塩小路下る東塩小路町 JR京都伊勢丹店 美食餐廳街
- 交通方式:JR京都站西口閘口往出，正面EAT PARADISE 3F
伊藤久右衛門～ 生朱古力
同樣大受觀光客歡迎，非常出名嘅名店。
生朱古力嘅外層撒上咗抹茶粉，散發抹茶清香。
入口即溶嘅幸福感滿載，奶油同抹茶味道得以絕佳嘅平衡，非常推薦！
店鋪情報
- 名稱: 伊藤久右衛門 京都駅前店
- 地址: 京都府京都市下京區東塩小路町5791F
- 交通方式: 從JR「京都站」徒歩約3分鐘
京都限定嘅美味
京菓子處 鼓月～姫千壽煎餅(有機抹茶)
日本人經常購買嘅手信一，使用咗有機栽培嘅宇治抹茶。
脆脆嘅餅乾，滿滿奶油味之餘，仲帶有雞蛋香味，可能有啲人會覺得好甜。
唔洗擔心，夾層嘅抹茶奶油，帶有抹茶嘅苦澀，啱啱好中和返餅乾嘅甜味，喺兩者完美嘅協奏之下，邊食邊喺心中大叫Bravo、Bravo！
店鋪情報
- 名稱: 京菓子處 鼓月 伊勢丹京都店
- 地址: 京都府京都市下京區烏丸通塩小路下る東塩小路町 JR京都伊勢丹 B1F
- 交通方式：JR京都站徒步約2分鐘
PRESS BUTTER SAND～奶油夾心餅乾＜宇治抹茶＞
乜話！嗰間PRESS BUTTER SAND居然喺京都站都開咗新店啦！而且仲有販售京都限定口味。
嚟到京都，絕對唔可以錯過呢家最近人氣高漲嘅手信。餅乾夾有抹茶奶油同焦糖奶油，兩種濃郁滑順嘅奶油，同鬆脆扎實嘅餅乾，兩者配搭得天衣無縫、簡直難以用言語形容呢款餅乾係何等嘅美味，真係太好食啦！就連唔太鐘意食抹茶嘅FUN! JAPAN團隊成員都不禁大叫好食啊！
店鋪情報
- 名稱: PRESS BUTTER SAND 京都站店
- 地址: 京都府京都市下京區烏丸通塩小路下る東塩小路町 西口2F南北通路
- 交通方式：JR京都站西口閘口出嚟，左前方嘅「京名菓・名菜處 京」範圍入面
日式口味、西式作法、打造嶄新口感
京BAAMU （京ばあむ）～抹茶豆乳年輪蛋糕
一層豆乳、一層抹茶、層層相疊，打造出口感紮實且濕潤厚實嘅年輪蛋糕。
最外層裹上咗抹茶朱古力。第一眼望落去可能會覺得好甜。放入口中，個味道完全同想像嘅截然不同，甜度啱啱好，絕妙嘅美味。
豆乳同抹茶嘅組合，唔會好甜、亦唔會太苦。口感濕潤柔軟，非常美味。再配搭上外層抹茶朱古力鬆脆嘅口感，口感非常特別。
店鋪情報
- 名稱: 京BAAMU （京ばあむ） KYOTO TOWER SANDO店
- 地址: 京都府京都市下京區烏丸通七條下る東塩小路町721-1 1F
- 交通方式：JR京都站新幹線中央口徒步約4分鐘；中央口徒步約3分鐘；地下東口直通徒步約2分鐘西口
Malebranche～茶の菓
「茶の菓」所使用嘅濃茶係Malebranche精心講究嘅茶葉，所飄盪嘅香氣比一般抹茶來得濃。抹茶餅乾夾層嘅白朱古力，啱啱好沖淡咗濃茶餅乾略為苦澀嘅口感。呢個餅乾就好似嗰款大家去北海道必買嘅經典手信，白之戀人，法式貓舌餅嘅口感，味道卻係抹茶口味。抹茶同白朱古力嘅配搭簡直係完美，非常好食。適合同咖啡、茶一齊享用，度過一段美好嘅午茶時光啦。
店鋪情報
- 名稱: Malebranche京都伊勢丹B1店
- 地址: 京都府京都市下京區烏丸通塩小路下る東塩小路町 JR京都伊勢丹 B1F
- 交通方式：JR京都站徒步約2分鐘
Comments