哈哈哈哈哈哈哈哈哈！只係一條白蘿蔔到底點解會著咗衫？！而且下半身凈係得圍裙又唔著褲，嗶嗶嗶咁樣我要call警察嘎喇！
自從日本逃跑大根爆紅之後，市面上就出現咗好多得意（又有點搞怪）嘅蘿蔔週邊。而我哋一般睇到嘅大根商品幾乎都係光脫脫嘅造型，無諗到今次YOU+MORE竟然推出咗Cos成「蔬果店老闆」嘅大根攬枕！
繼之前嘅115cm巨型大根攬枕之後，YOU+MORE今次再次用大根炒熱話題，竟然推出咗概念類似Barbie公仔嘅大根攬枕，身高約52cm，配有一件T-Shirt同一件圍裙。
幫大根套上T-Shirt、著好圍裙，再順一順佢嘅蘿蔔葉頭髮之後，一位（？）靚仔蔬果店老闆就咁誕生咗！
小姐，買唔買返斤菜？定❤係❤要❤買❤我❤？
好啦，果然「佛要金裝，人要衣裝」，打扮一吓配上有型又風騷嘅頭髮（其實只係蘿蔔葉XD），其實真係幾man，令人忘記佢其實只係一條蘿蔔嘅感覺。
「挨過嚟啦，靠喺我懷中坐低。」
大根要變身霸氣蔬果店老闆都唔成問題，放喺梳化上，真係好有衝動想撲進佢嘅懷抱～其實如果你願意嘅話，仲可以幫佢手工製作一件西裝，顯得大根更加型仔。（反正都會著衫咯，準備多幾套啦XDD）
「唉，我就係萬人迷，大家都搶住要攬我。」
呢個姿勢點睇都覺得好漏打，人哋都已經攬實你仲擺出咁風騷嘅姿勢！係咪玩嘢！
係啦，大家仲記唔記得前面小編話，附贈嘅衫係一件圍裙。無錯，就係傳說中嘅「一件（裸體）圍裙」！無褲，佢竟然唔著褲！所以將大根翻轉過嚟，就會睇到佢嘅patpat哈哈哈哈哈哈哈。（好符合商品名稱「性感蘿蔔攬枕」）最後附上YOU+MORE官網條link俾各位，鐘意呢位蔬果店老闆嘅姐姐快D去睇睇啦～
Source: Felissimo
© 妞新聞 www.niusnews.com
Comments