講起拍拖約會三大必備浪漫情節仲唔係「海景、夜景、摩天輪」? 而第一個浮現喺你腦海嘅景點又會係邊度呢？想精心策劃一場成功嘅約會其實並唔難，你只要帶著你嘅另一半嚟到「橫濱港未來」就已經成功咗一半啦！橫濱港未來嘅拍拖景點人氣必去景點係咩? 等我哋一一話過你知！
無去過地標塔Land Mark Tower唔好話自己去過橫濱
去橫濱港未來如果無去過橫濱地標塔（Land Mark Tower），就好似去巴黎無去巴黎鐵塔一樣，總係覺得個旅程差咁啲。入面1樓到5樓係購物商場「Land Mark Plaza」，男友鍾意嘅個性皮件雜貨、女友鍾意嘅潮流配件服飾都應有盡有。夏天又太熱、冬天又太凍，咁喺Land Mark Plaza拖吓手仔行吓街拍吓拖就啱唒喇，好Sweet喔！
如果你想安排個浪漫晚餐，推薦你去地標塔5樓嘅景觀餐廳。嚟到日本必食嘅HARBS水果千層蛋糕、AFURI柚子拉麵、同幸豬排都有。想食壽司、燒肉、牛舌、下午茶、中華料理都唔成問題！地下1, 2樓嘅「未來橫丁」就聚集咗日式居酒屋同異國料理，好適合小酌放鬆一下！
仲有呀, 上到69樓嘅Sky Garden展望台仲可以睇到美麗閃耀嘅橫濱港同摩天輪嘅夜景，日頭同夜晚嘅景都好迷人。如果咁啱撞正生日，就更加要去橫濱地標塔，因為生日當日壽星可以免費上展望台，喺273公尺嘅高空收生日祝福，人人都感動到永生難忘！
可愛日本雜貨購物樂趣 MARK IS 港未來
日本旅遊橫濱必買聖地!由澀谷站搭東急電鐵東橫線可以直通港未來線，喺「港未來」站落車後，就到連住個車站嘅「MARK IS港未來」。同橫濱地標塔唔同嘅係，MARK IS港未來比較偏向居家生活風格，有3COINS、Salut!、Daiso、212 KITCHEN...等必行嘅可愛日本雜貨店同平價休閒服飾店舖。
MARK IS港未來有好多日本人心水嘅餐廳，一到食飯時段總係高朋滿座，選擇多又平又抵，又啱日本人嘅胃口！建議一到橫濱港未來就食個午餐先，探索吓當地人嘅飲食生活都係旅行嘅一大樂趣嚟㗎嘛，你話係咪？
橫濱人嘅集體回憶 橫濱紅磚倉庫
橫濱必去!西元1859年橫濱成為日本第一個開阜嘅港口，作為同世界接軌嘅出入口，橫濱港嘅重要性不言而喻。1911年起港邊嘅紅磚倉庫陸續動工，原本就好熱鬧嘅橫濱港變得更加繁榮。而家紅磚倉庫已不具有港灣倉庫嘅功能，但就成為咗行街Shopping、食飯約會嘅好去處。
你可以喺呢度買到文青小物、獨家紀念品、特色手信，品嚐美味料理，喺洋溢著異國風情嘅園區入面星空夜語。聖誕節期間仲會有聖誕裝飾同特設溜冰場，12月嚟嘅話千祈唔好錯過呀！
港邊嘅童話村“橫濱太空世界Cosmo World”
「橫濱太空世界」入面有一整排粉色嘅建築，一嚟到好似感覺去咗個童話世界咁。你唔使花一整日嘅時間留喺樂園，淨係需要揀自己想玩嘅遊樂設施，咁樣你就可以有更多時間安排喺其他行程度。夜晚食完飯、睇完夜景，唔好唔記得要嚟搭呢個世界最大嘅時鐘型摩天輪，當你升到112.5米嘅高空，橫濱港嘅經典地標都可以一覽無遺，五光十色嘅霓虹照亮夜空同戀人彼此，呢15分鐘可能係你呢一生最浪漫幸福嘅時刻。
日本海上健兒嘅搖籃 帆船「日本丸」横濱港博物館
由JR「櫻木町」站行約1分鐘，就可以見到白色船「日本丸」。建於西元1930年嘅日本丸，由昭和初期起作為練習船培育咗無數船員。總航行距離約183萬公里，約莫相當於圍住地球行咗45.4周，內部展示咗當時船員嘅生活樣貌。退役後嘅日本丸靜靜地咁停泊喺港灣，你可以喺鋪設完善嘅木棧道上面，一邊散步一邊欣賞咁有歷史感嘅日本丸。
大型活動舉辦地方、日劇最愛外景拍攝地 臨港公園
橫濱港未來最大面積嘅綠地「臨港公園」，有大片草皮同沿海步道，係當地人先知嘅祕密拍拖約會聖地。呢度都曾經出現喺好多日劇當中, 例如《網球甜心》（上戶彩主演）、《鐵板少女小茜》（崛北真希主演）、《唯一的愛》（龜梨和也、綾瀨遙主演）同《海猿》（伊藤英明主演）…等等。橫濱港未來喺每年6月都會喺呢度舉辦盛事「橫濱開港祭」㗎，兩天內總共吸引約70萬人到場添！
同時擁有海景、夜景同摩天輪嘅橫濱港未來，實在係太適合約會喇。下次同另一半嚟東京自由行時，一定要排橫濱港未來落行程呀！如果你仲想知多啲關於橫濱嘅情報，歡迎大家留話俾我哋FUN! JAPAN知，亦好歡迎大家同我哋分享你嘅私房景點㗎！
Comments