夏天嘅氣溫高得好恐怖，炙熱嘅陽光真係令人招架唔住，喺戶外運動簡直好攞命呀！鐘意運動嘅您，揀室內運動就啱晒啦，唔單止可以享受運動嘅樂趣，仲唔會因為運動反而令自己身體唔舒服。您有無聽過「壁球」呢項運動呢？簡單嚟講，就係喺室內空間入面，對住牆擊球嘅運動，室內空間比較細，球速快，對於訓練反應係好有幫助嘅運動，無論係個人訓練，或者係雙人對打都得，唔受氣候影響而且趣味性十足，成日喺電視劇入面睇到好多白領階級從事壁球嘅運動，更加係增添咗大家對呢項運動嘅好感度啊！
當傳統遇上現代
一直以嚟都係日本旅遊超人氣觀光地嘅京都，古色古香嘅風情，令全世界嘅遊客聞名而來，無論係世界遺產定係日本傳統文化，除咗令人驚豔都令人意猶未盡，好多人到訪過一次，就欲罷不能，成日都想喺忙碌嘅生活當中，安排出時間到京都行吓充電再返到自己國家繼續努力，準備下次嘅出遊。如果您鐘意運動嘅話，都可以計劃喺2021年參加World Masters Games關西，壁球嘅比賽項目就係喺京都市！唔單止可以俾自己一個合理嘅理由再次去京都玩，更加可以體驗喺京都打壁球嘅完美衝突感，令您嘅旅程紀錄更加豐富！
除咗伏見稻荷大社之外，京都仲有呢D秘境
保津川係一條流經京都府南部嘅河川，長約13公里。以前係用嚟運輸物品嘅水道，而家由嵯峨嵐山到龜岡呢段，開放俾遊客搭船遊覽，欣賞保津川峽谷嘅獨特美景。
春天嘅櫻吹雪，
夏天嘅清涼夜，
秋天嘅紅楓葉，
冬天嘅峽谷雪。
一年四季唔同嘅面貌，一年吸引咗大約30萬人嘅遊客到訪，一趟遊船時間大約係兩個鐘，一於趁呢兩個鐘投入保津川嘅懷抱，忘卻惱人嘅俗事啦！
👉保津川遊船網站：https://www.hozugawakudari.jp/
大覺寺與祇王寺
乘搭都市巴士可以直接喺「大覺寺站」落車，或者係乘搭嵐電喺嵐山站落車之後，徒步大約25分鐘即可抵達。大覺寺建立咗大約1200幾年，由嵯峨天皇所建，喺天皇去世之後改為寺院，主要用嚟供奉不動明王。呢度亦都係侯孝賢導演嘅「刺客聶隠娘」部分嘅拍攝場景，喺大覺寺官網上面，可以睇到勅封心経殿「戊戍開封法會」嘅倒數，入面存放咗天皇所抄寫嘅般若心經，喺每60年一次嘅戊戍年嗰陣，會開封進行法會，亦即係今年嘅10月1月到11月30日會開放進行參拜，今年錯過咗就又要再等多60年㗎啦！
從大覺寺再徒步大約25分鐘路程，就可以抵達祇王寺，兩間寺廟嘅入場卷可以一齊購買，價錢為600日圓。祇王寺嘅美，會令人頓時忘卻自己身在何處，綠意盎然已經唔足以形容，樹林同苔庭連成一線，祇王寺嘅綠，足以驅逐心中嘅憂、腦內嘅愁，喺吉野窗內，閂咗燈之後，透過陽光反照出嚟嘅綠光透進屋內，令人屏息而嘆！到訪祇王寺，帶走呢一片綠吧！
👉大覺寺：https://www.daikakuji.or.jp/
京都嘅不同風情等住你嚟探索
嚟京都市參賽或者係觀賽World Masters Games 2021關西，同時將京都嘅美收入眼簾齊齊帶返去，與京都一同創造出獨一無二嘅回憶啦！
更多關於World Masters Games 2021關西資訊，請睇👉👉👉https://www.wmg2021.jp/en/
Comments