應廣大讀者要求，今次編輯部會同大家深入探討靜岡縣「青木原樹海」嘅神秘一面！到底點解呢個地方會如此陰森，令人迷失自我？樹海內又有乜嘢特別之處？立即就等FUN! JAPAN為大家介紹！
何謂「青木原」？
「青木原」即係位於富士山山腳下，一大片無邊無際嘅茂密森林。由於青木原所在地為富士山西北側山麓，因此當地人經常將青木原形容為「隱密於富士山陰影之下」。森林分為兩個部分，遊客經常到訪嘅地區僅屬於表面部分，森林深處與厚度皆難以估計，就連係動物都會避免走入森林深處！
「青木原」日文中嘅意思係「一片綠樹嘅平原」。內裡樹木緊密生長，生成嘅樹葉不斷層疊、形成厚厚一層，陽光幾乎無法照射穿透。至於點解只有青木原森林會生長成如此？或者就同呢個地方嘅獨特性有關。
火山熔岩
青木原地面係富士山爆發期間，由火山熔岩硬化所形成嘅岩石群。大約喺1200年前嘅西元864年，熔岩冷卻形成火山岩荒地。樹木、苔癬、灌木，還有昆蟲、松鼠、蝙蝠、鳥類等生命喺跨越1200年歲月後嘅現代，重新尋回返回青木原嘅道並於此地棲息、茁壯成長。
奇形異狀嘅迷人樹木
由於土壤深度十分淺，因此植物與樹木根部都不得不橫向發展，導致根部沿著表面蠕動，形態就好似爬行一樣。缺乏根部可以蔓延生長嘅範圍，使得樹木更加緊密生長，形成一座茂密森林，亦即係我哋所認識嘅「樹海」。
三大獨特洞窟
火山岩嘅形成，亦造就獨特形態洞穴嘅誕生。例如…
- 西湖蝙蝠穴：洞窟深約350米，內裡一整年都氣候溫暖，冬天時會棲息著大量蝙蝠
- 富岳風穴：深約201米，平均攝氏僅得3度，因此過去曾被古人當作雪櫃使用！洞窟主要構造為玄武岩，所以聲響都會被吸收而且唔會產生任何回音。
- 鳴澤冰穴，深約153米，洞穴內嘅冰柱一整年都唔會融化，就算係夏天都會維持一定寒冷程度。
獨特自然現象
由於地理位置獨特，棲息於樹海內嘅動植物群都十分特殊，所以青木原亦會發生以下奇怪自然現象。
特殊磁場除咗干擾機器……更會影響心靈！？
雖然青木原樹海經常被認為係一個指南針無法運作嘅地方，但上述只係事實一部分。如果將指南針放喺火山岩上，佢就會被火山岩磁性影響，但當您拎起指南針並保持一般手持正常高度的話，佢係可以正常運作㗎！
只有少數狀況之下，磁場會干擾手機訊號，或造成拍攝影片中嘅雜訊。部分動物，如昆蟲會偵測磁場並利用磁場進行定位及導航，因此好多動物都會選擇避開樹海以免影響自己導航；而走入樹海嘅遊客，就據聞當中有人曾經出現幻覺。幻覺產生嘅原因到底係磁場造成，定係來自幽靈……就不得而知。
寂靜無聲嘅環境下，您可能隱約聽見喃喃細語…？
樹海地面被植物根部與岩石覆蓋，幾乎無任何土壤、難以行走，所以要開拓簡直係難上加難！而且岩石都屬於玄武岩，當行走於石頭上時腳步聲都會全數被吸收，因此樹海裡頭可謂近乎寂靜無聲。喺如此安靜嘅環境之下豎耳細聽時，甚至可以聽見遠方空氣振動傳來嘅聲音𠻹。
一切傳聞嘅起源
2018年初，有Youtuber嚟到日本旅行時，喺青木原內做出一啲令人難以原諒嘅行為並傳遍全世界。實際上，青木原樹海嘅死亡傳說與故事亦係多不勝數！
幽靈出沒
喺科學知識普及之前，日本人深信青木原樹海之所以如此詭異，背後係全因為幽靈作祟。靈魂被困於此地，難以忘懷世間一切、無法升天，因此就特地做出靈異奇怪現象。
而且喺窮困、糧食缺乏嘅年代，國民習慣將老年人丟棄於山上任由佢哋自生自滅，亦即係日本所謂嘅「捨姥」（姥捨て、Ubasute）行為。由於青木原樹海嘅自然現象好容易會令人蕩失路進而餓死又或被動物吃掉、抑或餓至飢不擇食、繼而因食物中毒而死，所以亦有人就認為青木原嘅鬼魂，其實就係源自被遺棄嘅老弱病殘。
由文學與城市傳聞打造成嘅形象
1961年，日本著名作家松本清張出版咗一本名為「波之塔」嘅小說，內容講述一對情侶主角於故事結尾決定前往青木原樹海。同時，坊間多年來亦有多本漫畫將青木原描繪成容易迷失嘅神祕森林、指南針失效、內裡毫無動物棲息、遍地都係有毒植物等嘅形象，另一邊廂又有日本遊戲設計出類似青木原樹海嘅闖關關卡，甚至更有有從樹海行返出嘅生存者謠言指出有幽靈或妖怪會引誘外人進入森林深處，以上種種都令到青木原樹海內存在不可思議力量嘅說法甚囂塵上。
青木原樹海訪客大不同
造訪青木原樹海嘅訪客大致可分為三種。第一種係健行登山客，希望能夠好好享受完整森林自然景觀；第二種係冒險家、尋寶人士，希望尋獲他人遺留落嚟嘅物品，並追求驚險刺激或趁機搶劫；最後一種則係每年尋找森林內遺體嘅義工。青木原為想要從繁忙生活中喘息、又或能夠喺究靜環境中進行深度冥想嘅人士提供好地方，只不過以上三種訪客當中，總係會有人會從此永遠迷失於昏暗樹海中、或遇上難以挽回嘅不幸事件…
雖然已過世嘅人無法話畀後人知道佢哋所經歷嘅一切，但從樹海逃出嘅人嘅口中，我哋或者可以聽出部分端倪。有關青木原樹海嘅故事，編輯部將於下集繼續為大家介紹！
Comments