2020年東京奧運可以話係備受矚目嘅盛事，對於亞洲區國家嘅運動愛好者們嚟講，更加係趨之若鶩、無人不引頸期盼2020年來臨。除咗精彩賽事之外，開幕式同閉幕式亦一樣係全世界嘅目光焦點。然而，最近公佈嘅開幕式票價，又有冇令您頓時熱情減半呢？好彩，您仲有一年時間籌備去日本關西參加另一場4年一度嘅世界級運動大會開幕式－「World Masters Games 2021關西」。「World Masters Games 2021關西」同奧運嘅差別就在於，只要年滿30歲就人人都可參加兼角逐贏取金牌嘅機會。2017年喺奧克蘭落幕後，下一屆嘅舉辦國家就係日本，地點更加係旅遊大熱門嘅關西地區啊！偷偷地話您知，大賽嘅開幕式舉行地點已定為超人氣嘅旅遊目的地京都！
京都限定：夏日川床料理
京都旅行當然要玩得盡興，所以又點可以淨係參賽或觀賽呢！提到京都嘅夏季代表活動，就一定唔可以錯過消暑又清涼嘅「川床料理」。川床或「納涼床」（のうりょうゆか）文化遠從江戶時代就已經開始，多年來曾經歷多番變遷，亦曾因太平洋戰爭燈火管制而一度被禁止，但到咗1951年京都府議會終於批准再次舉行，納涼床活動先得以復甦。現時每逢夏季，鴨川附近都會變得熱鬧非常，一眾商舖紛紛於河川旁設製觀賞席畀客人喺茶店內享用茶點；而每年嘅5月到9月期間，除咗鴨川河畔會有納涼床店家營業之外，貴船嘅川床料理亦係另一大受歡迎之物。有別於設置在鴨川河畔旁嘅川床，貴船係指喺河川上架設宴席，客人可以一邊聽住潺潺流水聲，一邊享用新鮮又美味嘅日式料理，小朋友仲可以泡泡清涼河水，試問仲有嘢可以比如此享受更消暑呢？記得帶條毛巾擦腳，以免整濕座位啊！如果預算唔多，您又可以選擇品嚐貴船流水麵（流しそうめん）過過癮。麵條會由水道高處滑下，過程中要抓好時機點將麵條快速夾起，再沾上醬料入口，不但好食又好玩。日本文化體驗清單，自此又征服多一項！
去京都武道館睇空手道比賽
您仲知唔知有咩運動項目都係喺京都舉行呢？答案就係空手道喇！位於京都市左京區嘅武道館，不單只係一座設備齊全嘅綜合武道館，內裡嘅舊武德殿仲係日本最古老、被列為日本重要文化財之一嘅練武場。除此之外，武道館附近仲有喺1895年為咗祭祀第50代天皇而建立嘅平安神宮（へいあんじんぐう），而從平安神宮徒步再行約5分鐘，更有京都近代美術館以及京都市美術館。建築物外觀歷史與現代感兼備，與周遭氛圍卻絲毫無違和感，實在不得不佩服如此令人心曠神怡嘅空間規劃呢！
與世界接軌、開拓自身視野
無論您係觀賽抑或參賽，相信「World Masters Games 2021關西」都必定可以配合京都夏日風物詩，為您帶嚟一個截然不同嘅訪日體驗、不同凡響人生經驗！
想知道更多關於大會嘅詳情？即刻瀏覽http://www.wmg2021.jp/en/
Comments