每週人氣系列又同大家見面！今次要嚟分享嘅就係，由上一篇文章嘅主角女大生介紹、於澀谷區就讀同一所大學嘅女同學嘅化妝包。主角係一位好鍾意CEZANNE亦好鍾意100yen店嘅女生，到底化妝袋內邊樣產品係喺100yen店買嘅呢？而家就等我哋即刻為大家揭曉啦！
隨身攜帶假眼睫毛！！？？
一打開化妝袋，發現放喺CEZANNE腮紅旁邊嘅竟然係假眼睫毛。咩話？假眼睫毛？唔係應該朝早出門前就應該戴好嘅咩，應該唔使隨身攜帶啩？！
女大生就話：「因為我對眼細，所以平常必須用到假眼睫毛。將來成為社會人士後，我更打算接眼睫毛，但係因為而家冇咁多錢，所以先用住假眼睫毛。我習慣朝早先用一副、落堂後同朋友出去玩之前再加戴一副，然後軔再化返個比較濃嘅妝。」
但係每日都用兩副假眼睫毛的話，唔會好貴咩？
「唔會，因為係喺100yen店買嘅（笑）。我屋企枱面都放滿咗各式各樣嘅假睫毛𠻹。」
原來如此，假眼睫毛亦係可以喺100yen店買到嘅產品呢。
胭脂掃同眼影棒握柄越長就越容易用
「可以喺100yen店買到嘅唔只假眼睫毛㗎！」於是佢又拎出咗上圖三支胭脂掃同眼影棒：「買眼影送嘅眼影棒實在係太短喇，無法畫出我想要嘅妝容。」的確握柄比較長嘅化妝掃係會比較好用，而且又可以當自己係專業化妝師一樣好有型，但呢支掃居然都只係賣100yen，實在係太令人驚訝喇！而且因為夠平，所以更可以針對唔同眼影顏色而準備唔同眼影棒，睇嚟本人真係好鍾意用呢。
睇完呢篇文章後，大家覺得如何呢？原來日本嘅女大學生都好識得充分運用100yen店嘅商品嚟享受化妝樂趣呢！順帶一提，第一張圖中嘅摺梳同指甲鋤都係喺100yen店買得到嘅，睇完之後連我都想要即刻衝去100yen店掃貨呀！
Comments