打開日本女生手袋系列

人氣系列「打開日本女生手袋系列」又同大家見面，今次要嚟睇嘅就係原宿時尚OL嘅返工手袋。據聞手袋主人係一個因為手袋太亂，以致每次返屋企時都要花一陣時間先搵到鎖匙嘅女生，而手袋裡面裝嘅都係慣用隨身小物。事不宜遲，我哋就請呢位女生嚟親自解說佢手袋裡面究竟裝咗啲乜嘢啦！

隨身攜帶手機同耳機

我鍾意用手機嚟聽TED演講（TED係一個免費英文演講頻道，經常會邀請世界各地各領域傑出人物分享故事及想法）。TED演講畀咗我好多方面嘅啟發，因此每次聽TED時，節目都可以帶畀我備受激勵嘅熱血感。另外，佢同時亦係一個訓練英語聽力嘅好方法嚟㗎！

時刻保持雙手清潔、遠離細菌係良好習慣。因此，我每日每隔一段時間就會用清潔液洗手。

每逢冬天時，我雙手都會變得容易乾燥同敏感，因此洗手後搽護手霜就成為重要一環。我並無特別鍾情於邊個護手霜品牌，除非該護手霜味道夠好並且又有不俗滋潤效果啦！我目前使用嘅，就係以色列一個身體保養系列品牌─LALINE嘅其中一款護手霜。

事緣我某一日收工後到原宿行街時，無意中見到售賣LALINE產品嘅舖頭，結果就忍唔住買咗其中一款護手霜。試過後發現搽上手後好快就會吸收，有助我雙手保持潤澤又唔油膩，最重要係味道夠香！

我好鍾意飲咖啡，所以大約每十分鐘左右就想食粒薄荷糖保持口腔清新。由於我經常都會整唔見薄荷糖包裝盒，所以你可以見到我手袋裡至少有2到3盒薄荷糖。

為咗避免嘴唇乾裂，潤唇膏商品可謂所有女生嘅必備物品。Maybelline Baby Lips Love Color Bright Out Loud係我目前用緊嘅潤唇膏，由於佢係一支具有光澤嘅有色潤唇膏，所以我就唔需要再額外搽紅唇膏。

仲有VICTORIA’S SECRET唇膏亦係我最鍾意嘅產品之一，我由高中時代就已經開始用佢。

以上就係我手袋裡嘅物品，希望您會覺得有趣啦！寫完呢篇文章後，連我自己都好驚訝我居然可以喺手袋裡面塞咁多嘢，睇嚟我應該要更常整理手袋先得喇...