旅行最正嘅事之一，就係可以食到目的地國家最好食嘅美食。除咗好多到日本旅遊嘅人都知道嘅經典料理壽司、魚生、天婦羅之外，日本到底仲有啲乜嘢出名嘅美食呢？
其中一樣必食嘅，就係日式水餃喇！但喺食餃子之前，請容許我哋先為您介紹「餃子」呢樣美食嘅基本情報－
究竟乜嘢係餃子呢？應該點品嚐餃子呢？而又應該點食，先至可以食到最好食嘅餃子呢？
以下就係您必須知道嘅食餃子二三事！
乜嘢係餃子（Gyoza）？
餃子源自中國，通常餃子內餡都會包有切細咗嘅蔬菜，例如大蒜、白菜、蔥等同埋豬肉或者雞肉等碎肉。而表面好似紙一樣薄嘅麵皮，則係由麵粉同水混合製成嘅。
餃子烹煮方式可以有好多種，常見嘅料理方式有煎、蒸、炒、炸，或者係最簡單嘅水煮。
餃子有乜唔同嘅種類呢？
如果您想喺日本食餃子，咁您首先就要知道可以食到邊幾種餃子。
煎餃（Yaki Gyoza）
喺日本最受歡迎嘅餃子食法，就係「燒餃」（Yaki Gyoza），亦即係所謂嘅煎餃。餃子單面用芝麻油煎至微焦狀，口感相當酥脆；而餃子頂部（無煎一面）則係用煎餃時於鍋內產生嘅水蒸氣蒸熟即可。
水餃子（Sui Gyoza）
水餃子則係傳統中式餃子。煮法為將餃子簡單煮熟，而最通裝盤時保留湯汁即可。水餃子可以話係喺日本比較唔容易搵到嘅餃子種類，如果您想食水餃，就可能需要去專賣餃子嘅餐廳先至有機會食到喇！另外，一般中華料理餐廳亦通常都會提供水餃。
炸餃子（Age Gyoza）
炸餃子即係炸成嘅餃子，表皮酥脆、一啖咬落去時您會發現口感相當香脆。呢種餃子雖然並唔係所有賣餃子嘅餐廳嘅共通菜單，但依然可以喺部分賣餃子嘅餐廳度搵得到。
我可以喺邊度食到餃子？
好多日本家庭會喺屋企度煮餃子，但如果您想旅行時品嚐餃子的話，您都一樣可以喺多間餐廳入面搵到餃子嘅身影。其中一樣相當受歡迎同容易搵到餃子嘅地方，就係拉麵店。拉麵店通常都會提供餃子當做拉麵配菜，而拉麵店嘅餃子通常都為附屬小菜，並非正餐。
我應該點樣叫餃子？
當您嚟到餐廳時想叫餃子，店家通常都會以一人份或者兩人份上菜。一盤餃子大概會有6隻餃子，一個人食啱啱好，亦都可以兩個人一齊share。每盤價錢大約係200日圓到600日圓。
品嚐餃子最佳嘅方法，就係沾醬食。喺日本，隨餃子奉上嘅醬汁多數由豉油、醋、混有辛香料嘅辣油混合而成。雖然餃子就算唔點醬都已經非常好味，但您會發現稍微沾上少少醬汁的話，餃子香味會更突出㗎！
您可能會因為點咗份量較多嘅餃子，而有需要自己製作醬料。如果係咁，您就可以依照自己嘅喜好做出最啱個人口味嘅醬汁，如果您鍾意食有辣口味的話，您就可以加多啲辣油。
我應該點食餃子？
食餃子最好嘅方法，就係先用筷子夾起成個餃子，然後用餃子柔軟嘅側邊（無煎嘅部份）沾上醬汁，最後將餃子放入口。您或者會希望等餃子放涼咗後再食，但食嘅時候，都一樣要要留意餃子入面燙口嘅湯汁啊！
如果您無辦法一次食晒成粒餃子的話，您都可以咬住一半先，但請記住唔好將咬過嘅餃子又重新放返去盤上面或者再次沾醬汁，而係直到食完之前為止都需要夾住個餃子喎！
邊到可以搵到最好食嘅餃子？
如果您係一個餃子愛好者，您一定會聽過以下呢兩個日本知名餃子城鎮－栃木縣宇都宮市（Utsunomiya）同埋靜岡縣濱松市（Hamamatsu）。呢兩個城鎮都係以特色餃子而聞名，街上有多間唔同嘅餃子專賣店等著您嘗試，而且仲會提供湯圓餃子、蒸餃、煎餃等非常多元化嘅餃子𠻹！
濱松最出名嘅，就係有酥脆豆芽嘅特產餃子。除此之外，您仲可以喺呢度搵到蘑菇或海鮮餡等各式餡料嘅餃子，保證總有一款可以滿足到您胃口！
Comments