當講起廣島縣嘅吳市，唔知大家第一時間會諗起咩呢？日本人如果被問到有關對於吳市嘅印象，相信大部分人都會答戰艦與海軍。皆因面向廣島縣西南部、瀨戶內海嘅吳市，到了明治時代更成為日本海軍和海上自衛隊據點。今次，FUN! JAPAN編輯部親自走訪吳市，進行實地採訪！向大家介紹吳市嘅魅力與隱世景點！記得一定要睇到最後吖！
究竟廣島縣吳市係一個咩地方？
被稱為海軍之街嘅吳市，從廣島市內乘搭電車約30分鐘即可抵達。再者，瀨戶內海氣候溫暖，一年四季都適合旅行，亦係其魅力所在之一。吳市自古以來，以作為「天然優良海港」而聞名，亦係曾經建造「大和號」戰艦嘅港口城鎮。同時，吳市係唔少電影、電視劇、動畫嘅取景地。譬如電影《海猿》、動畫電影《謝謝你，在世界角落中找到我》，亦係以吳市作為其作品舞台，更吸引唔少粉絲親身去探索主人公嘅足跡，進行聖地巡遊喔！
吳市嘅旅遊地區大致分為「中心部」、「音戶・倉橋」、「川尻・安浦」、「安藝灘飛島海道」4個區域。
當中，中心部有展示1:10大小「大和號」戰艦模型嘅「大和號博物館」等著名景點、而音戶・倉橋區域係水上運動嘅隱世景點、川尻・安浦地區則擁有野呂山「Sazanami Skyline」嘅絕景兜風勝地。另外，喺安藝灘飛島海道區域，可以享受得到如島波海道一樣咁精彩嘅單車之旅喔！今次會介紹以上4個區域當中嘅倉橋區域、以及安藝灘飛島海道區域嘅魅力與隱世景點！
媲美島波海道嘅絕景海道「安藝灘飛島海道」
從吳市駕駛出發約40分鐘即可抵達嘅安藝灘飛島海道，係一條連結著從吳市嘅下蒲刈島，至愛媛縣今治市嘅岡村島共7座島嘅道路。
各島由7座橋所連接，從愛媛縣嘅岡村島、大崎下島、豐島、上蒲刈島、橫跨下蒲刈島去到廣島縣吳市・川尻，所串連出嘅海道全長約31km。
安藝灘飛島海道與島波海道一樣，係單車旅遊嘅著名景點路線。可以利用出租電動輔助單車（亦有普通嘅山地單車），悠閒地享受島上風光！與島波海道相比，除咗距離比較短，上坡落坡次數、交通燈個數亦比較少，即使係單車旅遊嘅新手，都可以安心地享受安藝灘飛島海道嘅單車巡遊喔。
感受日本歷史與文化嘅「下蒲刈島」
「下蒲刈島」係安藝灘飛島海道首站，亦係昔日瀨戶內海嘅交通要塞, 為2大主要停靠驛站之一。島內有多個絕美日本庭園，更被美譽為「庭園之島」而廣為人知。沿海亦有提供可以住宿嘅小型房屋、共用工作空間等配套，非常適合以「Workation」（ワーケーション）模式，一邊享受絕景一邊工作喔！
※「Workation」（ワーケーション）：由work+vacation組成嘅新詞彙，中文可以理解成將度假和工作合而為一。意思係於自己屋企以外嘅地方、或旅遊目的地、家鄉等放假先會去嘅地方，進行遙距工作。
下蒲刈島仲有超多美食喔！今次介紹嘅係名為「Okonomiyaki Kishina」（お好み焼き きしな）嘅餐廳。講起廣島當地著名美食嘅話，就不得不提御好燒（廣島燒）！呢間「Okonomiyaki Kishina」所提供嘅御好燒唔單止散發著一股溫馨嘅家庭式味道，價格仲非常親民兼分量十足！即使追加自己鍾意嘅配菜，埋單亦都唔超過1000日圓，CP值超高！加上店員們相當親切，店內氣氛極佳，小編超級推薦大家一定要去試試當中嘅好滋味喔！
熱愛水上活動嘅話絕不能錯過！隱世秘島「倉橋島」
「倉橋島」係舊海軍嘅秘密基地，位於廣島縣嘅最南端。島內嘅桂濱海岸除咗波浪平靜、水質透明度高，更加被選為日本海濱百選之一喔。桂濱海岸被一座名為「火山」嘅山包圍著，不過此火山不同彼火山，呢座火山只係名稱，並非名符其實嘅火山喔！亦推薦親身行一轉「火山」，喺山頂欣賞桂濱嘅美麗景致，體驗與別不同嘅行山體驗！
喺倉橋島，仲可以盡情享受水上活動！由於瀨戶內海幾乎係零波浪，海面相當平靜，所以就算係初學者都可以輕鬆體驗皮艇、SUP直立板等海上活動喔。
※其實小編都係首次體驗SUP直立板！可以話唔使驚驚青青都可以挑戰成功！
獨享吳市桂濱海岸絕景！海邊桂濱莊
「海邊桂濱莊」唔單止係島上嘅住宿設施，仲扮演著另一個角色，就係共用工作空間！加上位於海岸旁邊，從桂濱海岸徒步即可抵達，從房間就可以眺望得到漂浮於瀨戶內嘅島嶼。除咗絕景處處，就連房間名稱亦相當過癮！據說住宿用嘅房間，係以「KISUGO」（キスゴ）、「GIZAMI」（ギザミ）等魚類名稱所命名喔。
呢度簡直可以話係穩藏海灘景點！皆因平時喺呢個海灘出沒嘅就只有當地人、以及住宿者！唔單止可以喺度體驗沙灘瑜伽，仲可以向海邊桂濱莊申請，體驗SUP直立板等其他水上活動，相當過癮！
另外，住宿設施併設嘅Café除咗有提供飲品，仲有唔少美食任君選擇。小編超級推薦大家喺度嘆返個Lunch喔！菜式幾乎選用島上新鮮採摘、捕獲嘅蔬菜和海鮮等食材製作，另外仲可以品嘗得到喺其他地方比較少見嘅魚菜式喔。
- 旅館名稱： 海邊桂濱莊
- 地址：廣島縣吳市倉橋町才之木576-7
- 房間數目：7間
- 入住時間：15:00
- 退房時間：10:00
- 交通方式：從吳站駕駛出發，車程約35分鐘左右（如乘搭倉橋島路線巴士，需時約1小時6分鐘）
今次介紹嘅係從吳站駕駛出發約40分鐘即可抵達，擁有多個隱世美麗景點嘅地方！下次去廣島縣吳市旅遊嘅話，不妨稍微行遠少少，去一遊車站周邊以外嘅地方，感受不一樣嘅吳市吧！
Comments