【日本廣島】大和博物館、觀光船、咖喱…廣島縣吳市推薦旅遊景點

位於瀨戶內海一側嘅廣島縣吳市，曾經係一個以造船業與舊海軍軍港而繁榮興盛嘅城鎮。市內隨處可見歷史遺跡與現役船艦，整個地方充滿港口城鎮獨特氛圍。本篇文章將會介紹吳市嘅精選景點與著名美食！

廣島縣吳市喺邊度？

位於廣島縣西南部嘅吳市，係僅次於廣島市、福山市嘅廣島縣第三大城市。吳市面向瀨戶內海，戰前曾經為擁有日本第一造船技術嘅軍港，係一個人口超過40萬人嘅大城市。

從廣島站到吳站，乘搭JR吳線（快速）約29分鐘，或乘搭名為Kurealine嘅高速巴士約46分鐘即可抵達。

大和博物館（吳市海事歷史科學館）

戰前，吳市曾經係建造大和號戰艦嘅城鎮。大和博物館（吳市海事歷史科學館）係一個有助遊客了解關於推動日本近代化嘅吳市歷史，以及舊日本海軍歷史嘅景點。

館內分為4層，喺1F與3F設有各式各樣嘅展示區域。例如1F大和廣場內，就可以參觀得到1:10大小／全長26.3m嘅「大和號」戰艦模型、研發當時嘅設計圖、以及潛水調查時嘅水中影像。

另外，館內亦有展出魚雷、魚雷武器「回天」十型（試作型）等軍事武器。透過與戰爭時期所研發嘅軍事武器相關實物資料，令人更真切地感受到研發當時嘅氛圍，以及戰爭嘅殘酷。

去到3F，唔單止有體驗區域，仲可以喺度欣賞得到科學表演。當中，除咗可以體驗船隻模擬操縱、理解波浪特質嘅實驗水槽、船隻漂浮結構以及船隻嘅製作方法之外，仲可以透過展覽去體驗科學嘅不思議！大家可以喺玩樂嘅同時，學習關於船隻嘅各種科技小知識。除此之外，可以閱覽得到關於船隻和歷史資料嘅圖書室、以及可以飽覽吳港灣景致嘅展望台亦不容錯過。

登上展望台的話，更可飽覽曾經用作製造「大和號」戰艦嘅船塢遺址、巨大嘅液貨船、多艘往來船隻等，係一個可以感受吳市獨有風景嘅名勝之一。如果運氣好嘅話，仲可以遇見航行中嘅潛水艇喔！？

景點資訊

• 名稱：大和博物館（吳市海事歷史科學館）
  
• 地址：廣島縣吳市寶町5番20號
• 營業時間：
• 展覽室‧博物館商店／9：00〜18：00（展覽室入館時間至17：30）
• 圖書室／9：00〜17：00
• 定休日：星期二（如星期二為公眾假日，則改為翌日休館）
• 門票：一般（大學生以上）／500日圓、高中生／300日圓、中・小學生／200日圓、學齡前兒童免費。
• 交通方式：從廣島站乘搭JR吳線（快速）約32分鐘，於吳站落車後，徒步5分鐘。

透過鐵鯨館與觀光船之旅更深入了解吳市特色！

除咗大和博物館以外，吳市嘅周邊旅遊景點亦非常充實。例如，從大和博物館徒步1分鐘即抵達，使用曾真實航行嘅潛水艇所打造嘅體驗型博物館──海上自衛隊吳史料館「鐵鯨館」。

1F、2F除咗有展出與潛水艇構造及功能相關嘅資料，亦可以參觀到於1986年至2004年間，實際服役過嘅自衛隊潛水艇「秋潮號」內觀，體驗潛水艦乘員喺艦內嘅實際生活情况。

小編真心推薦「吳灣艦船遊覽」體驗行程。喺乘搭觀光船巡遊吳灣嘅同時，仲可以近距離觀賞大型船、海上自衛隊艦艇、潛水艦等。喺2F嘅開放甲板上，導遊會詳細說明與吳灣與艦船相關嘅資訊，即使唔多熟悉艦船嘅人都可以盡情享受呢一趟巡遊之旅喔。

特別推薦最後一班出發嘅「Yukure Cruise（夕呉クルーズ）」。航班每日都會配合日落時間運行，乘船期間可以順便近距離欣賞到喇叭演奏與由海上自衛隊艦船降下自衛艦旗嘅降旗典禮。日常生活中前所未有嘅船上之旅，一定會成為您旅行中嘅亮點！

景點資訊

• 鐵鯨館
  
• 地址：廣島縣吳市寶町5番32號
• 營業時間：
  商店：早上10：00〜下午6：00
• 定休日：星期二（如星期二為公眾假日，則改為翌日休館）、12月29日至1月3日。
• 費用：免費
• 交通方式：喺吳站落車之後，徒步5分鐘

景點資訊

• 名稱：吳灣船艦遊覽
  
• 營業時間：
  首班船／10:00
  第2班船／11:00
  六・日・公眾假日第3班船／12:00 ※平日休息
  第4班船／13:00
  第5班船／14:00
  請至少喺出發前20分鐘抵達櫃檯報到。Yukure Cruise（夕呉クルーズ）為日落前15分鐘出發臨時船班，每日出發時間不一，實際情況請預先諮詢。
• 定休日：星期二
  ※颱風等惡劣天氣會停航。詳情請自行再作諮詢。
• 費用：成人／1,500日圓，小學生／500日圓
• 發船地點：吳中央棧橋渡輪碼頭（廣島縣吳市寶町4-44）
  ※請至少喺出發前20分鐘抵達1樓櫃檯，並完成登船手續

吳市旅遊必買手信&必食午餐─吳海自咖喱！

海上自衛隊為維持隊員們健康，多個部隊都會固定喺每個星期五以咖喱飯作為午餐，因此吳市內多間餐廳都有提供海上自衛隊隊員嘅咖喱飯套餐，推薦親身去品嘗一下喔。

距離大和博物館非常近嘅吳HAIKARA食堂所提供嘅咖喱飯，係同潛艦「蒼龍號」嘅隊員們食嘅咖喱飯一樣㗎！2種咖喱口味裡面任意揀1款，每碟咖哩都會附上大量配菜。不過最令小編驚訝嘅係，咖喱套餐竟然係配搭牛奶（？！），而且仲係沿用舊時日本學校供餐時所使用嘅鐵盤作餐盤擺放，非常有舊日風情。咖喱口味方面，分別有醇厚風味嘅蒼龍咖喱、以及甜中帶辣令人不禁食上癮嘅潛艦咖喱，可以根據自己喜好去揀心儀口味呢一點亦相當加分！想將呢份美味帶返香港嘅話，市內多處亦有販售「吳海自咖喱」嘅即食咖喱包，啱晒買嚟做手信吖！

下次不妨親身踏足呢一個擁有無敵大海、以日本近代化歷史所打造出嘅城鎮─吳市，透過市内各個景點、品嘗當地美食、從而享受日本歷史和文化啦！