「水城」係指坐落於面向海洋、河川、湖泊嘅城堡，以海洋、河川、湖泊作護城河為防禦之用，因此亦有「海城」之稱。喺日本，愛媛縣今治城、香川縣高松城、大分縣中津城被稱為「三大水城」，本篇文章就要為大家介紹「三大水城」！
日本數一數二海城：「今治城」
於江戶時代所建造嘅「今治城」佇立於愛媛縣今治市瀨戶內海沿岸，係日本數一數二嘅海城。今治城由戰國武將藤堂高虎建造，於西元1602年開始興建，一共花上約6年時間完成築城。城堡利用當地優勢，將海水引入圍繞著城堡嘅護城河，因此遊客可以見到鯛魚等等嘅魚群縱影在此出沒。由於城內又設有當時日本國內最大型嘅「船入」（城郭專用港口），所以亦係昔日一大重要交通據點。順帶一提，據聞今治城嘅天守更係日本首座層塔型天守閣建築喔。
今治城亦係著名嘅賞櫻聖地，城內所種植嘅染井吉野為日本嘅春天增添唔少美麗色彩。天氣好嘅話，可以喺天守閣飽覽得到一大片瀨戶內海等美景，將四國絕景盡收眼簾。
景點資訊
- 景點名稱：今治城
- 地址：愛媛縣今治市通町3丁目1-3
- 開館時間：09:00～17:00
- 休館日：12月29日～12月31日
- 入場費：一般520日圓、學生260日圓、高中生以下或未滿18歲免費、長者（65歲以上）420日圓
- 交通方式：從予讚線「今治站」乘搭「往今治營業所」瀬戶內巴士約9分鐘，於「今治城前」落車
漂浮於香川縣海上嘅古城⁉「高松城」
高松城又名「玉藻城」，其別名由來係因為「萬葉集」詩人柿本人麻呂，喺讚賞讚岐國時吟誦出「玉藻よし（美好玉藻）」嘅枕詞而得來，因此其周邊海域亦被稱為「玉藻之浦」。城堡位於鄰接瀨戶內海嘅平地上，擁有三重天守，係一座設有水門並將海水引入內外兩側護城河，亦有設置船艙並配備軍船嘅水城。現時嘅玉藻公園內，亦即係高松城嘅舊址，可見得以完整保留至今嘅天守閣、北之丸月見櫓、水手御門、原東之丸艮櫓 （丑寅櫓）、石牆、護城河等建築。
景點資訊
- 景點名稱：高松城（玉藻公園）
- 地址：香川縣高松市玉藻町2-1
- 開館時間：09:00～17:00
- 休館日：12月29日至12月31日
- 入場費：成人（16歲以上）200日圓、小童（6歲以上16歲以下）100日圓、6歲以下免費
- 交通方式：JR「高松站」落車徒步約5分鐘
更多關於高松城資訊：
由名軍師・黑田官兵衛建造嘅「中津城」
「中津城」位於大分縣中津市市中心嘅中津川河口沿岸地區。中津城嘅護城河水源係將周防灘嘅海水引入到護城河而來，因此水位亦會隨著海水嘅潮漲潮退而產生變化。另外，由於中津城係由中心部分嘅本丸、北面嘅二之丸、南面嘅三之丸所組成嘅城郭，所以城堡形狀呈扇形，亦被稱為「扇城」。
中津城係一座由黑田官兵衛建造，卻由細川忠興完成築城嘅城堡。可能大家都有聽過黑田官兵衛呢個大名，無錯！就係曾經出現喺2014年嘅NHK大河劇『軍師官兵衛』中，成為當時熱話嘅人物。黑田官兵衛喺築城期間因立下戰功轉封他處而離開此地，再由之後入城嘅細川忠興，後繼興建完成中津城。
中津城一大特色，係擁有九州最古老嘅石牆。黑田時代嘅石牆係使用被加工成正方形嘅石頭所搭建而成嘅穩固石牆；而細川時代嘅石牆係利用岩石原本嘅形狀所堆疊組合而成，兩者嘅差異一目瞭然，令人從中更能清楚感受得到時代嘅差異。
景點資訊
- 景點名稱：中津城
- 地址：大分縣中津市二之丁本丸
- 開城時間：09:00～17:00
- 定休日：年中無休
- 入場費：成人（高中生以上）400日圓、兒童（6歲以上16歲以下）200日圓、學齡前兒童免費
- 交通方式：JR日豐本線「中津站」落車徒步約15分鐘
Comments