日本文具、生活雜貨唔單只好使好用，而且設計感與創意感往往都超乎您想像，部分商品設計甚至有趣到叫人分唔清本身用途。就好似FUN! JAPAN編輯部下面將要介紹嘅商品，第一眼望到時您可能甚至會懷疑佢係食品定文具呢！小編貼心小提醒，由於外觀真係、真係、真係相似度太高，使用之前一定要先確認，以免誤食啊（笑）。
即棄筷子造型原子筆
潮流興提倡環保觀念，即棄筷子雖然唔太環保，但只要出街食飯或多或少都會派上用場…仔細一睇，原來佢係一支原子筆！如果唔將筆蓋頭打開，好多人應該都會以為佢只係一對普通筷子吧？由於造型太過逼真，將佢放入鉛筆盒內，話不定可以呃到其他人（甚至呃埋自己？）呢。
調味料造型螢光筆
本應只會出現喺雪櫃內嘅調味料，如果出現喺文具堆裡面，見到呢個「奇景」嘅人唔知會有反應呢？其實，呢款係被設計成軟管狀嘅調味料造型螢光筆！全系列共有6種，包括有綠色芥末、粉紫色梅子醬、檸檬黃色生薑醬、暗黃色黃芥末、藍色藍色夏威夷以及紅色韓式辣椒醬等等，包裝幾可亂真，造型像真度堪稱100分！
「寫」得嘅生菜memo紙
一包標示著「無農藥，可放心食用」字樣嘅新鮮生菜…？拆開包裝，先發現原來佢係memo紙！一張張memo紙如生菜般一層層包住，使用時真係好似剝梗生菜咁！將葉片剝下，稍微攤平之後就可以寫字囉～
納豆盒造型萬字夾
納豆係日本傳統食物，對部分日本人嚟講甚至係每日必食之選，而呢款創意文具就將納豆盒元素融入萬字夾！咪以為裡面淨係得普通萬字夾，附帶嘅「醬汁」亦別出心栽製成磁石款式，只要將「醬汁」拎起，萬字夾就會被吸住，完美呈現出納豆牽絲景象（？）
紫菜手捲、玉子手捲毛巾
外貌睇上去非常簡單嘅條紋毛巾，捲起來後居然變成紫菜手捲與玉子手捲，膠盒更設計成類同超市包裝，由內到外都充滿講究之處，唔講清楚的話真係會以為係超市出售嘅商品呀！放喺書包或手袋內的話，話唔定真係會有人以為您帶著食物返工返學呢。
以上介紹嘅種種商品設計既有創意又方便，如果您有睇啱邊一款的話，歡迎到下面網址購買～
Comments