除咗「文化之日」與「勤勞感謝日」等日本獨有公眾假期，又或「七夕」、「聖誕節」等節慶紀念日，您又知唔知道日本有部分企業與業界仲會自行制訂「◯◯紀念日」嗎？喺為數眾多嘅「◯◯之日」、「◯◯紀念日」當中，有一個日子可謂日本無人不知無人不曉—就係「Pocky日」！Pocky屬於全球銷量No.1零食之一，大家應該都有食過，但您知道點解11月11日會被定為「Pocky日」嗎？除「Pocky日」之外，11月11日仲係唔同「◯◯之日」、「◯◯紀念日」，呢篇文章就要簡單同大家介紹～
Pocky日由來
「Pocky日」嘅出現，係為咗要令全世界知道並分享Pocky嘅幸福與樂趣。由於Pocky形狀同數字「1」相似，因此「Pocky」就被訂於11月11日。喺日本，Pocky日正式名稱其實係「Pocky&Pretz之日」，更於平成11年（1999年）11月11日獲得日本紀念日協會認證。
唔只「Pocky日」！近年仲有越嚟越多將11月11日訂為「紀念日」嘅情況！？
事實上，11月11日亦被Pocky以外嘅多種細長物件訂為紀念日。經小編查詢日本紀念日協會網站後發現，11月11日被認證為紀念日嘅數量原來就有接近50個！舉個例，大家都好熟悉嘅「美味棒（うまい棒）」，因為四條幼長美味棒排列起嚟都係「四條煙」，因此11月11日亦係「美味棒之日」呢！
另外，東京晴空樹城®內嘅「墨田水族館」，因為花園鰻從巢穴鑽出時嘅姿態同與「1」好似樣，因此為咗要提高館內人氣生物花園鰻嘅知名度，亦選定11月11日為「花園鰻之日」。
11月11日於中國被稱為「光棍節」
源自中國嘅「光棍節」，係因為11月11日由4個「1」組成，容易令人聯想到1人或單身而被命名。本屬單身嘅年輕人會趁呢日約埋一齊開party，或尋找對象、互相送禮。但近年，11月11日就漸漸演變成一年內最大型、最多折扣嘅購物節，有「雙十一」或「購物狂歡節」之稱，於中華圈相當出名 。
各式各樣紀念日嘅誕生除咗可以豐富大家嘅生活，甚至於歷史留名，但有可能亦會影響到一個產業嘅盛衰。特別係網路無國界嘅現代，亦能藉此讓各地人民獲得更豐富資訊與知識。1年365日每日都有唔同紀念日誕生，一一了解後，話不定您都可以從中發現好多新鮮又有趣嘅內容呢！
Comments