緊張刺激輪流抽出積木不斷往上疊嘅層層疊，相信大家都有玩過。但你有見過印滿動漫經典台詞嘅層層嗎？日前，專門推出各種日系動漫畫週邊嘅日本 MOVIC 公司，宣布喺11月推出「名偵探柯南經典台詞層層疊」商品。
「名偵探柯南經典台詞層層疊」基本玩法
基本玩法同一般嘅層層疊相同，但最特別嘅係，每一塊積木上都印咗《名偵探柯南》劇中嘅經典台詞，例如大家耳熟能詳嘅「真相永遠只有一個(工藤新一)」、「我叫江戶川柯南，係個偵探(江戶川柯南)」、「我去一去廁所(江戶川柯南)」等，共有 35 位角色、54 句台詞。
「名偵探柯南經典台詞層層疊」進階玩法
除咗本身識日文嘅人之外，對學緊日文嘅人嚟講，呢款層層疊係練習日文嘅好幫手。玩嘅時候可以喺抽出積木後模仿角色大聲唸出台詞，如果唸到食螺絲，或者讀錯咗，呢個時候其他人就可以學工藤新一語氣吐槽話：「錯了...佢唔係凶手...」，然後再罰多抽1塊積木。喺唔知道會抽到乜嘢台詞嘅情況下，要打醒十二分精神訓練日語能力，為層層疊遊戲再添多啲樂趣！
商品資訊
- 商品名稱：名偵探柯南 經典台詞層層疊
- 建議售價：2,750 日圓(含稅)
- 預計發售日期：2020/11
- 商品規格：每塊積木約 7.5×2.5×1.5cm
- 材質：木
©青山剛昌／小学館・読売テレビ・TMS 1996
Comments