鍾意食軟糖嘅各位讀者，相信對「Puré軟糖」都唔會感到陌生吧！品牌時不時都會推出季節限定口味或限定包裝，而最新一輪產品，就邀得Pokémon合作，首次推出比卡超造型期間限定商品！由外裝到軟糖都係滿滿嘅比卡超萌樣，各位粉絲必買！
Puré軟糖 電擊熱帶口味 6/2起日本全國發售
今次發售嘅「Puré軟糖 電擊熱帶口味」以菠蘿果汁口味作主打，配搭芒果、香蕉呈現出熱帶水果風情，並加上梳打風味、令各位食糖嘅時候可以親身感受比卡超攻擊招式「電擊」嘅麻痺感，夠晒玩味！獨特清爽彈牙口感同酸酸甜甜滋味非常夾，最適合提神時食！
愛心尾巴比卡超化身軟糖藏身包裝內
有食過Puré軟糖嘅人應該都知道，包裝內會混有限定「愛心」造型軟糖。今次發售嘅商品當然都唔例外，大人細路都鍾意嘅比卡超同樣將會化身成軟糖藏身於包裝內！除咗有愛心造型之外，雌性比卡超（愛心尾巴）亦會化身成軟糖，所以小編決定買到之後第一時間就係將全部「比卡超」倒晒出嚟，食之前搵下包裝入面究竟匿埋咗幾隻比卡超（笑）。
同期推出嘅Puré軟糖基本口味（檸檬、葡萄、麝香葡萄）嘅外觀包裝更會全面革新，於正面印上比卡超腳印。官方表示基本口味內亦有機會隱藏著比卡超造型軟糖，就算係買基本口味都一樣可以體驗收服比卡超嘅樂趣㗎！
超萌四款原創比卡超包裝♡
期間限定口味就連包裝都一樣咁講究設計。今期推出嘅四款包裝樣式都以比卡超大頭照做招徠，呈現出比卡超咀嚼軟糖(?)嘅滿足樣，令人勁想同佢合照然後post相上IG！各位精靈訓練員，四款全部買齊是常識吧？
商品概要
- 商品名：Puré軟糖 Pokémon 電擊熱帶口味
- 發售日：2020年6月2日（二）
- 参考售價：150日圓（己含稅）
- 重量：56克
- 發售地區：日本全國
Comments