日本人創意總係源源不絕，成日會推出令人驚訝又眼前一亮嘅創新小物。最近就有專門推出創意商品嘅企劃公司，將新元素用喺文具身上，逼真度高到令人分唔清到底係用得定食得...齊齊嚟睇吓既有創意又得意嘅「食用文具」精選啦！
蜜糖膠水
每次搽蜜糖嘅時侯，一唔小心就會搞到成手「黐立立」。呢枝同「Yamato膠水」聯名推出嘅「蜜糖膠水」一唧即用，就可以輕鬆解決以上問題，用佢就唔洗怕搽蜜糖會搽到「立黐黐」啦 ！
「蜜糖膠水」用嘅容器，同「Yamato膠水」所使用嘅容器係一模一樣。透明樽身加上橙色蓋，軟質蜂窩狀設計嘅海綿筆頭...明明係膠水樽身不過裡面裝嘅卻係蜜糖。除咗外表，據聞連用落嘅質感都同膠水一樣，還原度超高！只要擰開樽蓋，直接唧出蜜糖，就可以輕鬆將蜜糖搽喺多士或者PANCAKE上面，唔怕滴到周圍都係，或者整污糟隻手，超方便啊。
不過要小心謹記，唔好將佢同真膠水擺埋一齊，免得一時手快拎錯啊~
MARKER 拌飯素
MARKER都食得⁈外表睇落係一支支MARKER筆，但再望真啲先發現，原來係各種口味嘅「拌飯素」。只要打支MARKER 搖一搖，拌飯素就會出現好方便，可以直接倒落飯度增添白飯口感。對於成日帶飯嘅朋友仔嚟講係大好消息，只要拎著MARKER搖兩搖，就可以幫飯盒添加新口味。
「MARKER 拌飯素」最初推出嘅係關西口味系列，之後陸續推出福岡、北陸、東海地區限定等超多系列。今次係代表日本嘅調味料大集合，推出日本的味道系列，當中包括山葵、壽喜燒、柴魚、味噌等，一套共7支。不妨買個筆盒裝起佢哋，食LUNCH嘅時侯，將MARKER 拌飯素一字排開，絕對會吸引全場目光。
日本 FUEKI 漿糊紫菜雞蛋拌飯素
日本知名百年企業「不易糊工業」所推出嘅漿糊，以100％玉米澱粉製造、完全不含福馬林防腐劑。黃色「 Fueki 漿糊仔仔」大頭樽裝嘅「Fueki 不易糊天然小狗漿糊」，自1975年推出後，一直係備受大眾喜愛嘅長銷商品，而家已經深入民心演變為代表性指標，大多數日本人望見「 Fueki 漿糊仔仔」，就會第一時間就會諗起漿糊。
不過，今次要介紹嘅「 Fueki 漿糊仔仔」裡面唔係裝漿糊而係紫菜雞蛋拌飯素 ，有普通與迷你2種尺寸。普通版本可以用隨商品付上嘅小匙羹𢳂嚟用；而迷你版只要搖一搖，就可以倒出適量拌飯素 ，直接倒落食材上使用。
「創意食用文具」得意又盞鬼，趣緻得嚟又非常實用，無論係送人定自用都適合。不過，小編再次作出溫馨提示，因為外觀同真嘅文具相似度太高，請喺使用、食用之前一定要先確認一下。
Comments