位於佐賀縣鹿島市嘅祐德稻荷神社，係日本三大稻荷神社之一。色彩繽紛嘅樓門，比京都清水寺正殿仲要高嘅懸造式正殿，全部都係值得打卡拍呃LIKE相嘅地方。
祐德稻荷神社精彩睇頭1 必打卡！鮮豔繽紛「樓門」
一踏入神社境內，最先映入眼簾嘅就係鮮艷嘅樓門。仿造日光東照宮嘅陽明門設計，色彩繽紛嘅配色，非常吸眼球。左右兩面放咗佐賀縣傳統工藝「有田燒」製作嘅門神。建議以樓門旁嘅神池，同樓門加社殿為背景，拍照留念。每逢秋天，正殿前嘅巨大銀杏都會染上美艷嘅金黃色，更為神社多添色彩。
祐德稻荷神社精彩看點2 令人震撼！位於山腰嘅「正殿」
正殿位於離地18米高嘅山腰。依山為背景，以懸造嘅建築技術，建造喺高約18米嘅位置。來往正殿時，有往正殿上走嘅「上行參道」，同埋由正殿下來走返嚟嘅「下行參道」。而正殿天花板上，就雕繪咗兩隻鮮豔亮麗嘅鳳凰。正殿正下方就係岩崎社，呢到供奉嘅結緣之神，非常出名。
祐德稻荷神社精彩睇頭3 猛按快門！連綿不絕嘅「赤紅鳥居」
由正殿去奧之院嘅參拜道路上，佇立咗一道接一道連綿不絕嘅赤紅鳥居，呢個位完全係打卡影相嘅最佳地點，令人唔停咁按快門。據說赤紅鳥居，意味咗適合耕作嘅暖和春天。
祐德稻荷神社精彩睇頭4 一望無際！於「奧之院」長椅稍作休息♪
一路穿越赤紅鳥居，一路往上行，就會去到位於山頂嘅奧之院，能夠一眼眺望鹿島市市區至有明海一帶嘅遼闊景色。山頂仲有長椅，不妨一邊欣賞美景，一邊稍作休息。
祐德稻荷神社精彩睇頭5 多「外苑東山杜鵑苑・花園」4月中旬至5月下旬 杜鵑花祭
由正殿橫越神橋，可以去到東山杜鵑苑。一眼望去有成大概5萬株杜鵑，佔據哂整片山坡，由下而上嘅角度咁仰望嘅話，畫面相當震撼。4月中旬至5月下旬左右，會舉辦杜鵑花祭，吸引好多人嚟賞花。，而位於山頂嘅花園，就會隨住四季轉換，可以欣賞到油菜花、波斯菊、櫻花等多種唔同嘅花卉。另外，神社境內嘅日本庭院，亦有宜人景致，2月賞梅、4月牡丹、9月牽牛花、秋天賞楓，全部都好值得去睇。
祐德稻荷神社御守
呢個神社，有以馬做主題嘅「馬到功成御守（うまくいく守）」希望願望能夠馬到功成，順利實現（白、黃、黑三色）；仲有提升財運嘅「金運御守（金運守）」（大、小）；以櫻花為主題設計嘅「櫻鈴御守（桜鈴守）」（粉紅、水藍）等多種唔同嘅御守，祈求參拜客嘅願望皆心想事成。
關於神社
- 建立年：貞享4年（1687年）
- 主要供奉：倉稻魂大神（掌管生活各方面事項）、大宮賣大神（祈求才藝精進、福德圓滿）、猿田彥大神（掌管交通安全）
- 祭典：元旦祭（1月1日）、節分祭（2月3日）、種田祭（6月中旬）、秋季大祭（焚火）（12月8日）等
景點資訊
- 景點名稱：祐德稻荷神社
- 地址：〒849-1321佐賀縣鹿島市古枝乙1855
- 交通方式：
- 由JR長崎本線「肥前鹿島」站落車，喺車站前嘅「鹿島巴士中心」乘搭前往「祐德神社前」嘅祐德巴士，車程約10分鐘。「祐德神社前」站落車後，徒步即到。
- 由JR長崎本線「肥前濱」站行到到最近嘅巴士站，約需10分鐘，單純造訪祐德稻荷神社嘅話，建議由「肥前鹿島站」前往。
- Wifi: 提供免費WIFI上網
- 語言：
- 官方網站為英文
- 當地宣傳冊為英文、韓文、繁體中文
- 門票：免費
- 假日：全年無休
- 營業時間：全天候開放
Comments