便利店絕對係大家到日本旅行時經常會去嘅「景點」之一，路上總有一間喺左近絕不陌生。但唔知你喺搭JR嘅時候，又有無注意到有一間「老是常出現」嘅綠色招牌便利店呢？佢就係只會出現喺JR車站內嘅「NewDays」。
位處JR車站內嘅「NewDays」
「NewDays」係東日本旅客鐵路（JR東日本）公司於車站內開設嘅便利店品牌。從名字彷彿可以了解到品牌「從車站開展全新每一天」嘅理念。
「NewDays」主要出現於JR東日本嘅車站內，為繁忙嘅乘客們作出點點支持。品牌LOGO用上平易近人嘅綠色作底色，帶出「新鮮」「療癒」「清爽」等印象，並加上大寫斜體與小寫字母嘅組合，由2種顏色配搭充分表現出「躍動」與「速度」感。產品包裝上都會用上附有小電車圖案嘅LOGO，為品牌營造入屋親切感。
雖然「NewDays」店舖數量少於500家，但一日平均營業額就僅次於便利店界龍頭大哥7-11排名第2。就等我哋一齊嚟窺探一下「NewDays」嘅魅力啦！
去便利店一樣都要爆買！「NewDays」限量萌爆產品
正因為店舖位於車站站內，因此「NewDays」亦有出售唔少同JR電車相關嘅超可愛精品同大受海外遊客歡迎嘅動漫角色聯乘系列。以下幾款超人氣產品，唔知各位又有無喺搭乘電車嘅中途見過呢？
午後紅茶X迪士尼毛公仔系列
首先要介紹嘅，就係遠至日本國外都曾經掀起一陣「爆買」旋風嘅超人氣聯乘系列「午後紅茶×迪士尼包裝飲品」。自2016年推出市面以嚟每年都會掀起一番談論嘅呢款產品，內含「午後紅茶」樽裝奶茶一枝以及迪士尼毛公仔一隻，至今聯乘名單已出現過小熊維尼、大鼻與鋼牙等，而2019年就交由≪怪獸公司≫嘅毛毛同大眼仔接棒。由於每套定價只售800yen就已經又有得飲又有得送，因此有唔少粉絲趁住出售當日就會四出搶購！JR東日本範圍內只得NewDays以及NewDaysKIOSK有售，有興趣嘅就要記得多多留意喇～
※部分店舖不設發售。
限量萌爆電車小物，讓人想要通通帶走！
「NewDays」亦有出售唔少同鐵路或新幹線有關嘅週邊精品。由鐵道車卡模型、新幹線造型筷子或毛公仔、迷你電車筆座等，遊客只要身處「NewDays」內、就可以彷如置身於鐵道博物館嘅精品店般大買特買！除此之外，Suica企鵝週邊亦係「NewDays」長賣產品之一。文件夾、Suica卡套、原子筆、筆記簿等等實用性文具都通通印上企鵝造型，係咪非常得意先！再值得一提嘅係，角色精品以外「NewDays」仲不時會推出JR線或車站週年紀念等車站店舖限定精品，而且價錢仲只係由200yen起跳、非常親民，無論係鐵道迷定一般旅客都非常適合買返屋企做手信！
※部分店舖不設發售。
「NewDays」無人便利店１號店啟動
日本現時正大大推行電子貨幣，而「NewDays」就喺2019年7月時於JR武藏境站開設品牌首家駅全電子貨幣分店。店員只會負責將貨品上架或打掃待職務，客人需要自行到無人收銀處付款，而店內亦不設一般便利店可見嘅門券銷售等服務。
無人店舖之外，位處JR東海道線藤澤站月台嘅「湘南電車NEWDAYS」亦係品牌一大打卡名店。你都不妨跟住一眾外國遊客嘅腳步、一齊到藤澤站參觀一下為紀念湘南電車引退而保留至今嘅退役鈕道車廂吖？
Comments