OMG！今年秋冬又要被萌到喇～日本迪士尼近期真係接二連三地咁推出新商品，由小熊維尼，到超萌嘅Duffy都有，簡直係喺粉絲們嘅荷包搶錢！！今次東京迪士尼第一輪推出嘅秋冬商品，分別有小熊維尼，同埋一直人氣高止嘅Duffy & Friends。設計唔單止結合咗英倫風嘅格仔圖案，仲採用咗繽紛聖誕同埋冬季雪地嘅浪漫元素，只可以無論邊款商品都通通想帶返屋企！！
小熊維尼 秋冬英倫系列
首先！要先介紹小熊維尼嘅秋冬新商品，今次推出嘅大部份係實用嘅家品，例如杯碟餐具等。外觀設計採用咗熱情嘅英倫風格，黑紅格仔搭配小熊維尼嘅代表色「蜂蜜黃」，咁有朝氣嘅配色，放喺餐枱上，唔單止可以提升餐時嘅視覺享受，同時亦為陰沉嘅秋冬增添一啲鮮明色彩。
好似呢款小熊維呢嘅碟就相當可愛，將小熊維尼嘅慵懶一日描繪得栩栩如生，一邊食碟上面嘅嘢食，一邊可以欣賞碟底嘅印畫，既滿足口腹之慾又賞心悅目。仲有小熊維尼嘅碗都好吸引，邊邊位嘅設計，就好似有甜蜂蜜流落嚟咁，好精巧。
而呢款茶壺同埋馬克杯，都係強烈推介，唔單止可以配成一套，茶壺嘅部分係冷熱恉宜，可以沖一壺滾熱嘅奶茶或者朱古力奶嚟飲，絕對係寒冷冬天入面最正嘅享受。
其他商品仲包括有蝴蝶結髮帶、紙巾盒、毛巾等生活用品，仲有女生冬天必備嘅潤手霜同潤唇膏，蜂蜜牛奶糖嘅淡淡香味，令人搽咗之後好像咬一啖XD
商品資訊
- 商品名稱：小熊維尼 秋冬英倫系列
- 開賣日期：2019年11月1日
- 官網：Disneystore
Duffy & Friends Winter Holiday
東京迪士尼既然要出動，就當然唔止咁少嘢，最強大嘅商品而家先介紹！今次Duffy & Friends系列再出新招，推出「Duffy & Friends Winter Holiday」。今次唔單止喺角色換咗秋冬裝咁簡單，仲結合咗各種聖誕節嘅元素，仲推出咗呆萌雪人款，大家睇下面嘅介紹之前要做定心理準備，睇完驚你荷包會被搾乾！
呢款雪人靴造型嘅CUSHION，真係秒殺廣大粉絲！雪白色嘅毛絨絨觸感，可以用嚟做枕墊，亦可以拎嚟做攬枕，而且入面仲有可愛嘅Duffy、ShellieＭay、Gelaton同Stella，每個都可愛到犯規。而枕墊嘅後面仲有「Jolly Winter Holiday」刺繡，雪白毛底配上金黃英文字母，總之就係靚！
仲有呢款非常實用嘅銀包兼散子包，灰白嘅底色睇起嚟好典雅，而真正驚喜收埋咗銀包入面，打開銀包嘅話，可以見到Duffy同埋成班朋友仔喺雪地堆雪人、打雪仗。真係打開銀包畀錢都畀得開心啲。
除咗冬季節日之外，聖誕節系列亦係要寫清單嘅項目，千祈唔好唔記得帶埋佢地返屋企！根據以往經驗，每次推出季節限定嘅公仔都會令女生們瘋狂購物，今次Duffy同朋友仔嘅聖誕裝扮，除咗有應節嘅聖誕帽之外，最最別出心裁嘅係蝴蝶結圍巾，做得惟妙惟肖，Stella嘅粉紫色圍巾上仲有雪球點綴，真係太萌啦～～
如果嫌女仔多到就嚟屋企放唔落嘅話，可以選擇要吊飾款！每一款都係好溫馨咁攬住雪人，而且全部都戴咗迷你手套，仲要每夎裝扮都有少少差異，成個製作設計得好有心機，唔支持唔得～
最後總結只可以話，今年迪士尼嘅秋冬新商品實在太強勢，逼到所有Duffy同小熊維尼迷都要勒緊褲頭儲錢買～
商品資訊
- 商品名稱：Duffy & Friends
- 開賣日期：2019年11月6日
- 官網：Disneystore
Source：dtimes.jp
© 妞新聞 www.niusnews.com
Comments