日本藝術實驗網站SUPERMARKET KAKAMU（スーパーマーケットカカム），主要研究一啲療癒系（or 惡搞系？）嘅作品。近期佢地就推出咗一系列以「食物」為題材嘅特式家品，其中牛油多士床墊更床墊更加引發咗唔少日本網友嘅熱烈討論，就等我地一齊嚟睇吓究意呢系列商品有幾「特別」吧！（笑）
牛油多士
大家鍾意點樣食方包呢？有人鍾意食牛油多士，又或者搽果醬，甚至加埋唔同餡料整三文治。呢款床上商品系列就係用咗方包呢個創意想法，將大家對方包嘅印象製作出療癒（惡搞？）嘅商品。蓬鬆柔軟嘅多士床墊，上面可以加唔同嘅用品配件（餸菜餡料？），例如生菜、炒蛋、蕃茄等。連瞓喺床上嘅自己可能會都變成配菜？！ＸＤ
生菜蕃茄青瓜多士
剩係睇呢個瞓起多士床上嘅畫面，已經覺得聞到烤多士嘅香味。呢款設計仲要係有齊全套套裝。由生菜棉被、蕃茄枕頭、青瓜攬枕，甚至連睡衣都幫你準備好，而且喺加咗沙律醬口味，係咪超級正呢～～～
焗Pizza多士
配料（配件？）當然唔止咁少！如果你想食（？）得豐富啲嘅話，可以揀唔同嘅套裝組合，例如焗PIZZA多士(床)就有青椒、香腸、蘑菇等，仲可以換上蜂蜜芥辣，或者辣椒味睡衣，真係百搭，想點配搭都得！咁你或者就可以根據早餐口味，每日都換一換床嘅配搭。雖然話係療癒系商品，但小編覺得好似會令人越瞓覺越肚餓XD
爛番茄系列
除咗床上用品之外，仲有呢款爛番茄，係由西班牙布尼奧爾嘅「番茄節」啟發靈感！熟透多汁嘅蕃茄好容易軟爛，所以SUPERMARKET KAKAMU將呢種蕃茄被壓碎嘅狀態製成商品，可以用嚟做杯墊、書籤，甚至係小小惡作劇道具（？）就咁睇真係會以為係沾到番茄醬，非常有趣！
香蕉皮抹布
另外呢款香蕉皮亦係好令人驚喜。用咗成日係電視、電影入面見到路人踩到香蕉皮滑倒嘅景象為題材，結合路邊嘅香蕉皮，同埋香蕉皮滑行嘅想像，做出咗「香蕉皮抹布」！！無論係放喺屋企邊個位，好似黑暗中嘅星火一樣，非常令人注目。而且佢100%嘅以假亂真程度，相信真係會有人誤會，以為邊個食完香蕉亂咁丟皮(笑)。只可以佩服日本人嘅創意實在太強啦～雖然好無厘頭但總係令人好想買！
Source：SUPERMARKET KAKAMU
© 妞新聞 www.niusnews.com
Comments