熊野指嘅係和歌山縣南部到三重縣南部嘅地區，亦係被稱為「熊野三山」三座神社之所在地。前往熊野三山參拜嘅道路叫「熊野古道」。而「熊野本宮大社」係熊野三山嘅其中一座神社。呢篇文章要為大家講解，去參觀熊野本宮大社之前，要知道嘅必要事項。
參觀熊野本宮大社之前 要知道嘅必要事項
1. 鳥居前彎腰一鞠躬！要喺手水舍洗手漱口！
參道入口嘅鳥居，係代表神明所居住嘅神域同人類所居住嘅俗界之間嘅結界，喺穿過鳥居之前，一定要停下腳步一鞠躬。參道中央，由於係神明嘅通道，所以一般唔會行中間，請靠右邊入去，然後靠左邊出嚟。去到參道中途，左手邊嘅祓戶大神斜坡上，有一個手水舍，記得要喺呢度洗手同漱口。
2. 隨處可見三腳烏鴉標誌，代表乜嘢呢？
喺神社境內，隨處都可以睇到三腳烏鴉嘅標誌。呢隻三腳烏鴉叫「八咫烏」，係日本神話《神武東征》中登場嘅烏鴉。神話中有個情節係神武天皇抵達熊野時，喺神之使者「八咫烏」引導下，去到咗大和國(奈良)。所以八咫烏就係「引路神鳥」。神社事務所前方仲設置咗一個黑色嘅八咫烏郵筒，仲售賣可以用嚟做明信片嘅八咫烏繪馬（500日圓）。可以喺上面寫上訊息，再投入郵筒中寄出喔！順帶一提，日本足球協會嘅會徽圖案亦係一隻三腳烏鴉。
3. 各類型御守
神社售賣一系列以八咫烏(三足烏)為主題嘅御守，500日圓嘅御守（大・小）、500日圓嘅八咫烏御守吊飾、1,000日圓嘅足球御守等。另外，人氣漫畫《JoJo的奇妙冒險》作者荒木飛呂彦所設計嘅2,000日圓「和之守」都好受歡迎，呢個「和之守」嘅其中一面圖案係熊野嘅象徵「八咫烏」，背景用咗表示對大自然嘅敬意同埋成長嘅「嫩綠色」；而御守嘅另一面，就繪有道路，同路旁邊有一棵「薰衣草」。
4. 寶物殿必睇
神社境內嘅寶物殿推介一定要去。裡面收藏咗被指定為國家級、縣級嘅重要文化財。其中唔可以錯過嘅係，據說由江戶中期至後期製作嘅「熊野本宮並諸末社圖繒」，描繪咗被洪水沖毀嘅大齋原社殿。
前往熊野本宮大社嘅交通方式
由JR紀伊田邊站乘搭開往本宮大社嘅明光巴士、龍神巴士，車程約2小時，於本宮大社前巴士站落車步行即到。
關於熊野本宮大社
- 建立年：不明
- 主祭神：家津美御子大神
- 祭典：八咫烏神事 1月7日、新茶祭 4月上旬、渡御祭 4月15日
景點資訊
- 名稱：熊野本宮大社
- 地址：〒647-1731和歌山縣田邊市本宮町本宮
- Wi-Fi : 有和歌山Free Wi-Fi熱點
- 語言：官網有英文、現場有英文導覽手冊（200日圓）
- 門票：寶物殿 300日圓
- 休息日：無休
- 參拜時間：參拜 6：00～19：00、御守或朱印受理時間 8：00~17：00、寶物殿 9：00～16：00
Comments