各位觀眾，見習嘅小魔女們又返嚟喇！
今次推出嘅商品入面，有曲奇餅，好有第三代魔法堂嘅感覺，唔知道有無灑咗「魔法調味料」呢？（笑）
繼之前推出嘅BANDAI×《小魔女DoReMi》20週年商品之外，日本ITS'DEMO亦喺最近推出咗一系列紀念週邊商品，DoReMi、羽月、小愛、音符同小桃子等主角，著住「第一代魔女見習生」嘅服裝再度登場，分別有包包、文件、仲有零食！
收納袋、皮夾同卡片套
今次嘅商品以第一代魔女見習生為主題，圖案除咗著咗初代見習生服裝嘅主角們之外，仲有變身器同埋波龍，整體風格既可愛又色彩繽紛。包包系列有收納袋、皮夾同埋卡片套等可以買。
種類眾多嘅文具系列
文具系列有超多選擇，例如膠紙、MEMO紙、筆記本、FILE、原子筆等。（FILE仲要好閃）其中，MEMO紙嘅設計用咗主角角色嘅代表色，然後配上唔同嘅工具例如魔女帽、掃把、波龍與變身器，設計相當精緻，買咗都未必捨得用！
化妝鏡、手巾同細化妝袋
另外仲有化妝鏡、手巾仔同埋細化妝袋。其實以往出過嘅《小魔女DoReMi》週邊並唔多，今次ITS'DEMO推出嘅生活雜貨可以話相當齊全，買哂成套返嚟睇相都唔成問題～（笑）
棉花糖同曲奇 兩款零食
最後要介紹嘅棉花糖同曲奇餅呢兩款零食，棉花糖上印咗小魔女、波龍同變身器，而曲奇上就印上咗小魔女，仲有音符形狀，而且都係用咗主角們嘅代表顏色。雖然佢地身上著嘅係第一代嘅衫，但小編都係忍唔住腦補，覺得呢啲商品係出自「第三代魔法堂」，唔知有無灑到「魔法調味料」呢？（笑）今次嘅週邊已經喺日本全國ITS'DEMO店舖上架，各位小魔女嘅粉絲們敬請留意囉！
Source: sgs109
© 妞新聞 www.niusnews.com
Comments