長崎縣美術館欣賞西班牙美術作品及與長崎有關嘅美術展

長崎縣美術館位於長崎市，擁有東亞數一數二嘅西班牙美術作品及與長崎有關嘅美術品。另外，美術館嘅建築同周圍大自然相互融合，環境相當清幽。

長崎縣美術館簡介

2005年開幕嘅長崎縣美術館，坐落於長崎水邊的森公園一角。館內有以前日本駐中國、西班牙外交官—須磨彌吉郎所贈嘅西班牙美術品、以及與長崎相關嘅近代美術品等約7,000件藏品。

長崎縣美術館建築採用大量落地玻璃，營造充滿開放感嘅空間。美術館建築共分為兩部分：位於運河兩側嘅美術館棟，以及擁有博物館商店及服務台嘅展示廳棟。結合水景同大自然嘅建築設計，獲得海內外各地好評，並且榮獲好多設計同建築相關獎項。

長崎縣美術館，除咗展示廳，仲有咖啡店、禮品店、屋頂花園等。以下為你介紹美術館嘅必睇之處。

長崎縣美術館嘅二樓係常設展覽同開設特展嘅空間。特別係豐富嘅常設展覽非常值得一看，所展出優秀嘅西班牙藝術品，如畢卡索，米羅同達利等藝術家嘅作品，以及豐富嘅日式掛軸、屏風等美術藏品。美術館每年都會舉辦不同主題嘅館藏品企劃展覽。

除咗欣賞美術品，仲可以欣賞美術館周圍美麗嘅風景。首先，可以去連結展示廳棟同美術館棟、橫跨水道上方嘅「橋之迴廊」。喺橋之迴廊嘅咖啡店小休一下，品嚐採用長崎縣當地嚴選食材製作嘅料理，居高臨下，眺望前方運河風景，享受悠閒時光，多麼寫意！

另外，美術館屋頂有一個空中花園，可以享受寬闊嘅視野。日頭可以俯瞰長崎港來來往往嘅船隻，夜晚可以欣賞長崎港嘅港灣沿岸區，以及長崎市街道嘅夜景。

長崎縣美術館嘅開放時間為朝早10點至夜晚8點。休館日為每月第二及第四個星期一（如遇日本公眾假期則延至星期二休館）、日本新年假期。

美術館建築物參觀免門票，但若參觀收藏展或特展需另外購票。收藏展門票通常係成人一張400円円。（2019年6月資料）

JR長崎站乘搭路面電車長崎電氣軌道，於出島站下車，車程約4分鐘。於路面電車下車後步行3分鐘，即可抵達長崎縣美術館。或者醫療中心（メディカルセンター）電車站步行約2分鐘。

名稱：長崎縣美術館
地址：〒850-0862 長崎縣長崎市出島町2-1
交通方式：長崎電氣軌道出島電車站步行約3分鐘、或者醫療中心（メディカルセンター）電車站步行約2分鐘。
Wi-Fi支援：無
語言對應：中文、英文、韓文
購票方式：現場購票
使用信用卡：購票處不接受使用信用卡；商店內可使用：VISA、MasterCard、JCB、AMERICAN EXPRESS、Diners Club International、銀聯；咖啡店可使用：VISA、MasterCard、JCB、AMERICAN EXPRESS、銀聯。