小編內心：睇到唔只眼瞏瞏（音：瓊），仲好肚餓添～哈哈
我諗大家未整過都應該見過又可愛又好擬真嘅羊毛氈公仔啦？今次小編發現好得意嘅羊毛氈手作公仔！所以想即刻分享呢位來自日本嘅羊毛氈達人俾你哋睇佢啲作品！（日本人都有巧手呢～）佢整嘅羊毛氈作品都非常厲害，而且睇完會令人覺得特別「餓」！點解？快啲跟住小編一齊睇吓點解啦♡
Instagram上有一個帳號「ふらしさ」係專門分享各種食物嘅羊毛氈手作～無論係主食定甜品都難唔倒手作達人。從手握壽司、蛋包飯甚至到紅豆大福都應有盡有！雖然只係羊毛氈，但整出嚟既寫實又可愛，真到令人睇完都口水直流，好想食啊！！
蛋包飯同拉麵係小編最鍾意嘅作品之二！！唔理係被潷咗一啖嘅細節位，定係拉麵嘅麵同湯，還原度都好高呀！（好立體啊！）
蛋黃系列都好神啊～熱愛食生蛋黃嘅小編睇見都心心眼！嗰個蛋黃嘅深淺色澤甚至係光澤度都有照板煮碗呈現返出來㗎～（嗯，好想食.......）
講到日式料理，點少得手握壽司同過年菜呢？想食刺身壽司定係軍艦壽司通通都有～擺埋一齊真夠架勢！
仲有仲有，瑞士芝士火鍋都有整到出嚟！睇住食材一一被擺喺木盤上覺得特別療癒～籃入面啲麵包一塊塊都好令人心動啊！（冬天凍冰冰時嚟個芝士火鍋真係不得了，一定好幸福♡）
甜品當然都係重頭戲啦～有日本女生最鍾意嘅水果布丁新地，又有傳統紅豆大福，都整到好可愛！睇完會令人心情變好呢♡
呢位羊毛氈手作達人話佢嘅目標就係要做出各種「睇起嚟好好味」又「令人好想食」嘅羊毛氈作品～唔講咁多喇，小編睇到好鬼肚餓！鍾意羊毛氈嘅朋友快啲去Instagram followふらしさ，一齊期待日後有更多得意好味嘅羊毛氈食物啦♡
source：ふらしさ@Instagram
© 妞新聞 www.niusnews.com
Comments