日本最多森林，大自然之縣：高知

高知縣係大海、山、河川等自然豐富嘅地區。其中以森林居多，佔咗成個縣約84％嘅土地。另外，高知縣唔止自然環境豐富，仲建造咗各式各樣嘅歷史建築物同日曜市等觀光景點。

關於高知

高知位於四國地區嘅南部，係當中擁有最大面積嘅縣。觀光地區分為東部、西部、中部，以「路面電車」同角色主題電車「ごめん・はなり線（Gomen-Nahari Line）」連接各地。乘搭呢兩種電車遊覽各種高知觀光景點係最好嘅玩法。

高知接近亞熱帶，氣候溫暖。另外，沿岸、平原、山谷嘅氣候都各有不同為其特徵。沿岸地區全年刮強風，非常悶熱。而山區地方喺夏天嘅降雨量較多，冬天時落雪。所有地方整體嚟講最佳嘅觀光時期推薦9月至11月，夏天尾聲至秋天係最好。

今次小編就要為大家介紹高知必訪嘅觀光景點，一於嚟睇睇高知嘅魅力所在啦！

講到高知觀光當然唔少得遊覽自然景觀。例如有弓形海灣「桂濱」，蔚藍嘅太平洋以及沿岸蒼翠茂盛嘅松樹，完美襯托，係一個絕景嘅觀光景點。其餘仲有因雨水形成嘅鍾乳洞「龍河洞」，高知東西兩端嘅「室戸岬」及「足摺岬」，亦非常推薦去可以體驗划艇同乘搭觀光遊覽船嘅「四萬十川」。

以「高知城」為首，高知內有各式各樣具歷史性嘅建築物同設施。順便一提，高知城於18世紀左右建成、係日本唯一一座完整保留本丸御殿（城堡主人以及其家族居住嘅宅邸同政府大廳）嘅城堡。城内中心嘅天守有門及鯱嘅裝飾，可以嚟呢度一覽高知嘅街景。

高知以海產及農產品料理聞名。大部分餐廳集中於高知市内，亦有少量位於沿岸地區。另外，名產料理可以喺路邊車站輕鬆買得到。

高知有「田舎壽司」同「姿壽司」兩種傳統郷土料理。田舎壽司係喺柚子酢飯上放上竹筍、冬菇等蔬菜嘅料理。而姿壽司則係以塩漬咗鯖魚之後，包起柚子酢飯嘅料理。兩款料理完全唔同，但都用咗高知名産「柚子酢」，一樣散發淡淡嘅柚子清香。

高知盛產鰹魚，其中「鰹魚半敲燒（カツオの塩たたき）」為當地特色美食。以禾稈草燒鰹魚、炭烤、煙熏等方法烹製，撒啲鹽後就食得。睇落去好似普普通通，但燒過嘅鰹魚香味加上鹽嘅完美配合，製成一道令人垂涎三尺嘅特色美食。

高知中部地區嘅住宿設施完善。從酒店、旅館、民宿等類型應有盡有，特別以酒店居多。另外，東部地區有足摺溫泉郷，如果想享受浸溫泉嘅話，推薦鎖定呢個地區觀光旅遊。

想去高知玩，從高知機場出發就最方便喇。從高知機場出發去高知站，都係搭25分鐘高速直通巴士就到啦，而車費係720円。（截止2019年4月資訊）